Halkara Bitaraplyk gününe bagyşlanyp geçirilen onlaýn okuw sapaklary
2023-nji ýylyň 11,14,15-nji dekabrynda Türkmenistanyň Daşary işler ministrliginiň Halkara gatnaşyklary institutynda Russiýanyň Daşary işler ministrliginiň Moskwanyň Döwlet Halkara gatnaşyklary instituty (uniwersitet) bilen bilelikde Halkara Bitaraplyk gününe bagyşlanyp, diplomatik onlaýn okuw sapaklary geçirildi. Bu sapaklara institutymyzyň professor-mugallymlary we talyp ýaşlary gatnaşdylar.
Geçirilen okuw sapaklarynyň dowamynda Moskwanyň Döwlet Halkara gatnaşyklary institutynyň (uniwersitet) diplomatiýa kafedrasynyň professory, taryh ylymlarynyň doktory Ýuriý Raýkow, şol institutyň deňeşdirme syýasaty öwreniş kafedrasynyň professory, syýasy ylymlaryň doktory Ýelena Ponomarýewa hem-de TDIM HGI-niň Halkara gatnaşyklary we diplomatiýa kafedrasynyň professory, sosiologiýa ylymlarynyň doktory Öwezdurdy Muhammetberdiýew dagy «Häzirkizaman halkara gatnaşyklary», «Türkmenistanyň Bitaraplygy we onuň daşary syýasaty», «Ýewraziýa Balkanlary uly dünýä oýnunda» atly temalarda okuw sapaklaryny geçdiler.
Okuw sapaklarynyň ahyrynda talyplar özlerini gyzyklandyrýan soraglary bilen ýüzlenip, olara giňişleýin jogap aldylar we özleriniň düşünjelerini artdyrdylar.
Şamyrat AŞYRMYRADOW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň III ýyl talyby.