Halkara bäsleşige gatnaşyjylar türkmen myhmansöýerligi esasynda garşylandy
Paýtagtymyzyň Halkara howa menzili toý şatlygyny başdan geçirýär. Meýdança yzly-yzyna gonýan daşary ýurt uçarlary ýurdumyza ýene-de abraýly myhmanlaryň, türkmen diplomatiýasynyň milli mekdebinde geçiriljek «Halkara gatnaşyklary: parahatçylyk dialogynyň medeniýeti» atly halkara bäsleşige gatnaşyjylaryň ençemesini getirdi. Halkara gatnaşyklaryň merkezi hökmünde ykrar edilen gözel paýtagtymyz myhmanlara gujagyny giňden açdy.
Mälim bolşy ýaly, 2024-nji ýylyň 22 — 25-nji maýy aralygynda Türkmenistanyň Bilim ministrliginiň hem-de Daşary işler ministrliginiň Halkara gatnaşyklary institutynyň bilelikde guramagynda «Halkara gatnaşyklary: parahatçylyk dialogynyň medeniýeti» atly halkara bäsleşik geçirilýär. Bu halkara bäsleşige daşary ýurtlaryň 9-ysynyň 11 sany abraýly ýokary okuw mekdebinden 40-dan gowrak magistrler we talyplar, şeýle hem ýurdumyzyň 22 sany ýokary okuw mekdebinden talyp ýaşlar gatnaşýarlar. Gatnaşyjylar dabaraly ýagdaýda, ýokary taýýarlykly, halkymyzyň milli myhmansöýüjilik, dost-doganlyk, açyk göwünlilik, hoşniýetlilik däplerine laýyklykda garşy alyndy. Myhmanlary Türkmenistanyň Daşary işler ministrliginiň Halkara gatnaşyklary institutynyň mugallymlarydyr talyp ýaşlary, meýletinçi ýaşlar güler ýüz bilen garşyladylar.
Ýörite maksatnama laýyklykda, 2024-nji ýylyň 22-nji maýynda myhmanlar halkara bäsleşigiň geçirilýän ýeri bolan türkmen diplomatiýasynyň milli mekdebi bilen ýakyndan tanyşdylar. Bu abraýly bilim ojagyndaky «Türkmen diplomatiýasynyň taryhy» muzeýi, «Ak öý», «Ýaş žurnalistler» ylmy-döredijilik gurnagynyň çägindäki okuw studiýasy, «Ýaş diplomatyň sesi» atly elektron gazetiniň redaksiýasy bilen tanyşlyk myhmanlarda ýakymly täsirleri galdyrdy. Olar institutyň okuw studiýasy tarapyndan ýörite guralan «tegelek stol» gepleşiginde öz ýürek buýsançlaryny, pikir-garaýyşlaryny beýan etdiler.
2024-nji ýylyň 23-nji maýynda bolsa Türkmenistanyň Daşary işler ministrliginiň Halkara gatnaşyklary institutynda dabaraly ýagdaýda halkara bäsleşigiň açylyşy bolar hem-de bäsleşigiň ilkinji tapgyrlaryna badalga berler. Halkara bäsleşikleriň, olimpiadalaryň yzygiderli ýagdaýda Türkmenistanda geçirilmegi buýsandyryjy ýagdaýdyr. Munuň özi daşary ýurtlaryň abraýly ýokary okuw mekdepleridir iri ylym-bilim merkezleri bilen hyzmatdaşlygyň has-da berkeýändigini alamatlandyrýar.
Uzukjemal ARTYKOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň I ýyl talyby.