Gurbannazar Ezizowyň doglan gününiň 82 ýyllygy mynasybetli döredijilik duşuşygy geçirildi
2022-nji ýylyň 28-nji fewralynda Türkmenistanyň Daşary işler ministrliginiň Halkara gatnaşyklary institutynda Türkmenistanyň halk ýazyjysy, Magtymguly adyndaky döwlet baýragynyň we Ýaşlar baýragynyň eýesi Gurbannazar Ezizowyň doglan gününiň 82 ýyllygy mynasybetli döredijilik duşuşygy geçirildi. Oňa şahyryň maşgala agzalary, şahyr Artykjemal Annaöwezowa, institutyň mugallymlary we talyp ýaşlary gatnaşdylar.
Institutyň jemgyýetçilik guramalarynyň we “Ýaş žurnalistler” ylmy-döredijilik gurnagynyň bilelikde guramagynda geçirilen bu döredijilik duşuşygynda şahyryň gyzy Ýazgül Ezizowa kakasynyň ömür ýoly, döredijilik dünýäsi bilen bagly gyzykly gürrüňleri berdi. Döredijilik duşuşygynyň dowamynda şahyr Artykjemal Annaöwezowa şahyryň goşgularynyň çeperçilik aýratynlygy, onuň geljekki ýaş şahyrlar üçin nusgalyk mekdep bolup durýandygy barada gürrüň berdi.
Institutymyzyň Halkara žurnalistikasy fakultetiniň talyplary tarapyndan şahyryň aýdyma öwrülen ajaýyp goşgularynyň ussatlyk bilen labyzly ýerine ýetirilmegi duşuşyga gatnaşanlara ruhy lezzet paýlap, duşuşygyň täsirliligini has-da artdyrdy.
Döredijilik duşuşygynyň ahyrynda halypa ýazyjy-şahyrlarymyzyň döredijilik ýollaryny öwrenmek, şonuň bilen bagly duşuşyklary yzygiderli geçirmek üçin giň mümkinçilikleri döredip berýän hormatly Prezidentimize köp sagbolsun aýtdylar.
Aýlar ATAJYKOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň II ýyl talyby.