Görnükli şahyryň döredijiligine bagyşlanan duşuşyk
26-njy fewralda Türkmenistanyň Daşary işler ministrliginiň Halkara gatnaşyklary institutynda Türkmenistanyň halk ýazyjysy, Magtymguly adyndaky döwlet baýragynyň we Ýaşlar baýraklarynyň eýesi Gurbannazar Ezizowyň doglan güni, şeýle hem Çagalaryň teleradio ýaýlymlarynyň Halkara güni mynasybeti döredijilik duşuşygy geçirildi. Žurnalistikanyň nazaryýeti we amalyýeti kafedrasynyň hem-de institutyň jemgyýetçilik guramalary tarapyndan guralan döredijilik duşuşygynda institutyň mugallymlary we talyplary görnükli şahyryň maşgala agzalary, şeýle hem Maýa Kulyýewa adyndaky Türkmen milli konserwatoriýasynyň mugallymy, Türkmenistanyň halk artisti Atageldi Garýagdyýew, “Miras” teleradioýaýlymynyň işgäri Aýsoltan Begenjowa bilen duşuşdylar.
“Türkmenistan-parahatçylygyň we ynanyşmagyň Watany” diýlip atlandyrylan şu ýylyň 1-nji martynda G. Ezizowyň doglan gününe 81 ýyl dolýar. Duşuşykda görnükli şahyryň gyzy Ýazgül Ezizowa çykyş edip, kakasynyň ömür ýoly, döredijilik dünýäsi bilen baglanyşykly gyzykly gürrüňleri berdi. Türkmenistanyň halk artisti Atageldi Garýagdyýew bolsa şahyryň ajaýyp goşgularyna döredilen aýdymlary ussatlyk bilen ýerine ýetirdi.
Duşuşygyň dowamynda Aýsoltan Begenjowa her ýylyň mart aýynyň birinji ýekşenbesinde bellenilýän Çagalaryň teleradio ýaýlymlarynyň Halkara güni hakynda, şeýle-de “Siziň üçin körpeler” gepleşiginiň alypbaryjysy bolup zähmet çeken döwründäki iş tejribesi barada täsirli gürrüňleri berdi.
Döredijilik duşuşygynyň ahyrynda oňa gatnaşanlar hormatly Prezidentimize ussat ýazyjy-şahyrlarymyzyň ömür we döredijilik ýollaryny öwrenmäge döredip berýän mümkinçilikleri üçin hoşallyk sözlerini aýtdylar.
Sona HALYKOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň talyby.