GÖNI WIDEOARAGATNAŞYK ARKALY AÇYK SAPAK GEÇIRILDI
2025-nji ýylyň 11-nji martynda Türkmenistanyň Daşary işler ministrliginiň
Halkara gatnaşyklary institutynda 2025-nji ýylyň – “Halkara parahatçylyk we
ynanyşmak ýyly” diýlip yglan edilmegi hem-de Türkmenistanyň hemişelik
Bitaraplygynyň şanly 30 ýyllygy mynasybetli, şeýle-de Türkmenistanyň Halkara
parahatçylyk we ynanyşmak ýylynyň dowamyndaky işleriniň we ileri tutýan
ugurlarynyň Konsepsiýasyna laýyklykda göni wideoaragatnaşyk arkaly açyk sapak
geçirildi. Sapagy Türkmenistanyň Daşary işler ministrliginiň Halkara gatnaşyklary
institutynyň Halkara gatnaşyklary we diplomatiýa kafedrasynyň dosenti,
Türkmenistanyň Adatdan daşary we Doly ygtyýarly ilçisi, Türkmenistanyň ussat
diplomaty, tehniki ylymlarynyň kandidaty Çary Nyýazow “Türkmenistanyň
Bitaraplyk diplomatiýasy we hoşniýetli hyzmatdaşlyga gönükdirilen halkara
başlangyçlary” atly tema bilen çykyş etdi. Göni wideoaragatnaşyk arkaly geçirilen
açyk sapaga ýurdumyzyň ähli ýokary okuw mekdeplerinden talyplar gatnaşdylar.
Açyk sapagyň başynda halypa diplomat Çary Nyýazow häzirki wagtda
hormatly Prezidentimiziň baştutanlygynda ýurdumyzda parahatçylyksöýüjilikli,
hoşniýetli goňşuçylyk, sebit hem-de ählumumy derejedäki netijeli hyzmatdaşlyk
ýörelgelerine esaslanýan döredijilikli daşary syýasat strategiýasynyň yzygiderli
durmuşa geçirilýändigini belledi. Halypa Ilçi öz çykyşynda hemişelik Bitarap
döwletimiziň parahatçylyk hem-de ynanyşmak ýörelgelerine esaslanýan daşary
syýasatda we diplomatiýada uzak möhletleýin milli maksatnamalary amala
aşyrmak üçin ähli mümkinçilikler döredilýär we bu babatda döwletara we
hökümetara derejelerde syýasy diplomatik, halkara hukuk, söwda-ykdysady
geňeşmeleriň netijeli gurallaryny işe girizmekde ýurdumyzyň diplomatik
gullugyna uly talaplar bildirilýär diýip gürrüň berdi.
Sapagyň ahyrynda ussat diplomat Garaşsyz, baky Bitarap Türkmenistanyň
içeri syýasatynyň dowamy hasaplanýan daşary syýasy başlangyçlarynyň dünýäde
parahatçylygy, deňhukuklylygy, hoşniýetli hyzmatdaşlygy goldaýandygy barada
belläp geçdi.
Sähra ATAÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň III ýyl talyby.