GERMANIÝALY WEKILLER BILEN DUŞUŞYK GEÇIRILDI
2025-nji ýylyň 15-nji oktýabrynda Türkmenistanyň Daşary işler ministrliginiň Halkara gatnaşyklary institutynda Germaniýanyň Akademiki alyş-çalyş gullugynyň (DAAD) hem-de Ylmy-gözleg jemgyýetiniň (DFG) wekilleriniň gatnaşmagynda okuw sapagy geçirildi. Oňa institutymyzyň professor-mugallymlary we talyp ýaşlary gatnaşdylar.
Onuň maksady ikitaraplaýyn duşuşyklary geçirmek, halkara hyzmatdaşlyk meselelerini ara alyp maslahatlaşmak we talyp ýaşlar bilen söhbetdeşlikleri geçirmekden ybarat boldy. Duşuşykda hünärmenler türkmen talyplarynyň dil boýunça tomusky okuwlara gatnaşmaklarynyň, Türkmenistan bilen Germaniýanyň arasyndaky ylym-bilim hyzmatdaşlygyny has-da giňeltmäge ýardam berýändigi barada aýratyn nygtap geçdiler.
Talyplar bilen okuw sapagy tamamlandan soň, mugallymlar bilen hem aýratynlykda duşuşyk geçirildi. Onda professor-mugallymlar daşary ýurt dillerini okatmagyň täze usullary we öňdebaryjy tejribeleri barada hünärmenler bilen giňişleýin pikir alyşdylar.
Germaniýanyň Akademiki alyş-çalyş gullugy daşary ýurt dillerini okatmak babatda Türkmenistan bilen öňden gelýän hyzmatdaşdyr. 1997-nji ýyldan bäri, Germaniýanyň Akademiki alyş-çalyş gullugy ýurdumyzda ýokary okuw mekdepleriň talyplary, uçurymlary hem-de ylmy barlagçylary üçin talyp hakly maksatnamalary boýunça geňeşmeleri geçirýär.
Germaniýanyň Akademiki alyş-çalyş gullugynyň Türkmenistandaky maksatnamalary ylym, bilim we medeniýet ulgamlarynda iki ýurduň arasyndaky gatnaşyklary pugtalandyrmaga gönükdirilendir.
Sahydöwlet HÜMMETJUMAÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň III ýyl talyby.