Gender deňligi boýunça onlaýn-treningi
2021-nji ýylyň 10-11-nji noýabry aralarynda Özbegistan Respublikasynyň “Laýner” şypahanasynda gender deňligi, halypaçylyk we ýolbaşçylyk ukybyny ösdürmek meseleleri boýunça gyzlar üçin sebit treningi geçirildi. Bu çärä Türkmenistanyň Daşary işler ministrliginiň Halkara gatnaşyklary institutynyň wekilleri hem wideoaragatnaşyk arkaly gatnaşdylar. Treningde Özbegistan Respublikasynyň, Gazagystan Respublikasynyň, Gyrgyz Respublikasynyň, Täjigistanyň, Türkmenistanyň (Türkmenistanyň Daşary işler ministrliginiň Halkara gatnaşyklary instituty, Halkara ynsanperwer ylymlary we ösüş uniwersiteti, Türkmenistanyň Döwlet, hukuk we demokratiýa instituty, Türkmenistanyň Zenanlar birleşiginiň Merkezi geňeşi) wekilleri, şeýle hem Özbegistandaky BMG-niň Ösüş maksatnamasynyň gender meseleleri boýunça hünärmeni Muhabbat Turkmenowa, Merkezi Aziýanyň zenan liderleriniň gepleşikleriniň sekretariaty we beýlekiler çykyş etdiler.
Treningiň birinji gününde Merkezi Aziýa ýurtlarynda zenanlaryň jemgyýetdäki orny, ýagny stereotipler, olaryň jemgyýetdäki we syýasatdaky ornunyň ewolýusiýasy, gender deňligini üpjün etmek barada halkara ülňüler, gyzlaryň ýolbaşçylyk ukyplary we durnukly ösüş maksatlaryndaky üstünlikleri barada gürrüň edildi. Treningiň ikinji gününde «Zenan, parahatçylyk we howpsuzlyk» temasy bilen BMG-niň Merkezi Aziýa üçin Öňüni alyş diplomatiýasy boýunça Sebit merkeziniň geňeşçisi Andreý Hanžin gender deňligi boýunça kabul edilen konwensiýalar, LUXIP SA kompaniýasynyň ýolbaşçysy Nikolas wan Bek, zenanlaryň telekeçilik ulgamynda eýeleýän orny barada täsirli çykyş etdiler.
Gülruh GELDIÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň I ýyl talyby.