«Geljegiň damjalary»: suw, energetika we azyk howpsuzlygynyň arabaglanyşygy»
2025-nji ýylyň 29-30-njy ýanwary aralygynda Ýewropada Howpsuzlyk we Hyzmatdaşlyk Guramasynyň guramagynda «Ýyldyz» myhmanhanasynda «Geljegiň damjalary»: suw, energetika we azyk howpsuzlygynyň arabaglanyşygy» atly ýaşlaryň sebitleýin okuw maslahaty geçirildi. Bu çärä Halkara guramalaryň, Türkmenistanyň ministrlikleriniň we pudak edaralarynyň agzalary bilen bir hatarda, Türkmenistanyň ýokary okuw mekdepleriniň talyplarydyr mugallymlary, şeýle-de isleg bildiren raýatlar hem gatnaşdylar.
Bu çäräniň birinji gününde okuw sapagyna gatnaşyjylar suwy rejeli peýdalanmak, energetika we azyk howpsuzlygy babatda birnäçe bilermenler ýaş nesil bilen öz gymmatly tejribelerini paýlaşdylar. Şeýle-de, gatnaşyjylaryň arasynda toparlaýyn ýaryşlar we interaktiw oýunlar, pikir alyşmalar gurnaldy.
Çäräniň ikinji gününde, maksatnamanyň çäginde, gatnaşyjylar «Bagtyýarlyk» agyz suwuny arassalaýjy desgasyna gitdiler we onuň işleýşi dogrusynda birnäçe gyzykly maglumatlary aldylar.
Bu okuw maslahaty ýaşlaryň pikir alyşmagyna, suw, energiýa we azyk howpsuzlygyny üpjün etmek baradaky halkara çemeleşmeleri öwrenmegine we bu ugurdaky meseleleri çözmek üçin teklipleriň işlenip düzülmegine goşant goşmagyna mümkinçilik berýän möhüm bilim we çekişme platformasyna öwrüldi.
Gülruh GELDIÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň IV ýyl talyby.