Gelin-gyzlaryň arasynda terbiýeçilik ähmiýetli wagyz - nesihat çäre geçirildi
2023-nji ýylyň 3-nji aprelinde Türkmenistanyň Daşary işler ministrliginiň Halkara gatnaşyklary institutynda “Maşgala mukaddesligi, türkmençilik, gelin-gaýyn gatnaşyklary” ady bilen terbiýeçilik ähmiýetli wagyz-nesihat duşuşygy geçirildi. Oňa Türkmenistanyň Daşary işler ministrliginiň Halkara gatnaşyklary institutynyň zenan mugallymlary, talyp gyz-gelinleri we birnäçe myhmanlar gatnaşdylar.
Duşuşykda Türkmenistanyň Döwlet medeniýet merkeziniň Döwlet kitaphanasynyň II derejeli kitaphanaçysy, kümüş saçly ene Bibigözel Mämmedowa, Aşgabat şäherindäki Kömekçi mekdebiniň mugallymy Ogulgerek Annasaparowa, Türkmenistanyň Saglygy goraýyş we derman senagaty ministrliginiň Aşgabat şäheriniň 3-nji saglyk öýüniň maşgala lukmany Oguljan Berdiýewa dagy maşgala mukaddesligi, gyz-gelin edebi, milli däp-dessurlarymyz, türkmeniň keşdeçilik sungaty, onuň gadymylygy dogrusynda gyzykly gürrüňleri bilen çykyş etdiler.
Duşuşygyň dowamynda Hormatly Prezidentimiziň milliligimizi ösdürmekde, türkmen maşgalasynyň binýadynyň berk bolmagy dogrusynda alyp barýan döwletli işleri barada giňişleýin gürrüň berdiler.
Duşuşygyň ahyrynda talyplar myhmanlar bilen sowal-jogaplar alyşdylar.
Ogulnäzik RAHMANOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň I ýyl talyby.