Galkynan ykbally nesiller
2023-nji ýylyň 2-nji sentýabrynda Türkmenistanyň Daşary işler ministrliginiň Halkara gatnaşyklary institutynda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň Arkadag şäheriniň Ruhyýet köşgünde Bilimler we talyp ýaşlar güni hem-de täze okuw ýylynyň başlanmagy mynasybetli geçiren umumy okuw sapagyna, şonuň ýaly-da hormatly Prezidentimiziň gatnaşmagynda hut şol günde bolup geçen şanly wakalara bagyşlanan hoşallyk maslahaty geçirildi. Oňa institutyň talyp ýaşlary, professor-mugallymlary uly ruhubelentlik bilen gatnaşdylar.
Hoşallyk maslahatynyň dowamynda edilen çykyşlarda eziz Diýarymyzda ylymly, bilimli, sagdyn ruhly ýaşlary ýüze çykarmak, olary döwlet tarapyndan goldamak ugrunda alnyp barylýan beýik işler, Arkadag Serdarly bagtyýar ýaşlar ýylynyň altyn güýzüniň ilkinji gününde geçirilen taryhy dabaralar, şeýle-de Gahryman Arkadagymyzyň ýaşlara beren atalyk pentleriniň many-mazmuny, ähmiýeti baradaky buýsançly gürrüňlere giň orun berildi.
Mälim bolşy ýaly, Bilimler we talyp ýaşlar gününde hormatly Arkadagymyzyň Arkadag şäheriniň Ruhyýet köşgünde geçiren umumy sapagy ýaşlaryň ykbalynda möhüm waka boldy. Milli Liderimiziň 2023-2024-nji, täze okuw ýylynyň ilkinji gününde bagtyýar türkmen ýaşlaryna geçen umumy okuw sapagy çuňňur many-mazmuna baý bolup, ýaş nesillerimiziň her biriniň kalbynda ýakymly täsirleri galdyrdy hem-de olaryň baýramçylyk şatlygyny artdyrdy. Hoşallyk maslahatynda çykyş edenler şular dogrusynda giňişleýin durup geçdiler.
Maslahatda Gahryman Arkadagymyzyň umumy okuw sapagyna gatnaşan türkmen diplomatiýasynyň milli mekdebiniň talyp ýaşlarynyň çykyşlaryna-da orun berildi. Olar şeýle beýik bagtyň miýesser edendigi üçin juwan kalbyndan çykýan hoşallyk sözlerini aýtdylar. Edilen çykyşlarda Gahryman Arkadagymyzyň geçiren umumy okuw sapagynyň döwürleri, nesilleri, köňülleri birleşdirýän hakyda sapagyna öwrülendigi aýratyn nygtaldy.
Hoşallyk maslahatynyň ahyrynda oňa gatnaşyjylar güneşli Diýarymyzy bagtyýar nesilleriň iň arzyly arzuwdyr islegleriniň hasyl bolýan mekanyna öwren türkmen halkynyň Milli Lideri Gahryman Arkadagymyzyň, hormatly Prezidentimiziň janlarynyň sag, ömürleriniň uzak bolmagyny arzuw etdiler.
Durdynýaz GUWANJOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň II ýyl talyby.