GAHRYMAN ARKADAGYMYZYŇ TÄZE GOŞGUSYNA BAGYŞLANAN HOŞALLYK MASLAHATY GEÇIRILDI
2023-nji ýylyň 28-nji awgustynda Türkmenistanyň Daşary işler ministrliginiň Halkara gatnaşyklary institutynda Türkmenistanyň Halk Maslahatynyň Başlygy, türkmen halkynyň Milli Lideri Gahryman Arkadagymyz Gurbanguly Berdimuhamedowyň Gündogaryň görnükli söz ussady, akyldar şahyrymyz Magtymguly Pyragy hakda döreden «Pähim-paýhas ummany Magtymguly Pyragy» atly täze goşgusyna bagyşlanan hoşallyk maslahaty geçirildi. Oňa institutyň mugallymlary hem-de talyp ýaşlary gatnaşdylar.
Hoşallyk maslahatynda, ilki bilen, institutyň ylmy işler boýunça prorektory Begenç Mätliýew çykyş etdi. Ol öz çykyşynda «Pähim-paýhas ummany Magtymguly Pyragy» goşgynyň ähmiýeti hem-de özboluşlylygy dogrusynda belläp, türkmen halkyny Gahryman Arkadagymyzyň halkymyza peşgeş beren täze, ajaýyp eseri döretmegi bilen tüýs ýürekden gutlady.
Şeýle-de dabarada Türkmenistanyň halk suratkeşi, Magtymguly adyndaky döwlet we halkara baýraklarynyň eýesi, Hormatly il ýaşulusy Saragt Babaýew, «Edebiýat we sungat» gazetiniň bölüm redaktory Meretgylyç Ýagmyrow, institutyň Žurnalistikanyň nazaryýeti we amalyýeti kafedrasynyň mugallymy Ogulmaýsa Amanmuhammedowa, Halkara žurnalistikasy fakultetiniň 3-nji ýyl talyplary Mätgurban Mätgurbanow, Gurbansähet Gurbansähedow dagy çykyş etdiler. Olar öz gezeginde türkmen hem-de dünýä edebiýatynyň umumadamzat edebi hazynasyna ägirt uly goşant goşan akyldar şahyrymyz Magtymguly Pyragynyň döredijiliginiň dünýä ýüzünde içgin öwrenilmegi, eserleriniň halk köpçüligine ýetirilmegi, ýaşlary watançylyk ruhunda terbiýelemekdäki ähmiýeti barada bellediler.
Maslahatyň dowamynda oňa gatnaşyjylar Gündogaryň beýik söz ussady Magtymguly Pyragynyň çeperçiligiň beýik nusgasy bilen ýazylan eserlerini içgin öwrenmekde hem-de dünýä ýaýmakda uly tagallalar edýän Gahryman Arkadagymyza, Arkadagly Serdarymyza hoşallyk sözlerini beýan etdiler.
Jahantäç ÖWEZOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň
II ýyl talyby.