Türkmenistanyň futbol boýunça milli ýygyndy topary Gonkongyň ýygyndysyny kabul etdi
2024-nji ýylyň 11-nji iýunynda paýtagtymyzdaky «Aşgabat» köpugurly stadionynda «Dünýä çempionaty — 2026»-nyň hem-de «Aziýanyň Kubogy — 2027»-niň saýlama tapgyrynyň «Е» toparçasyndaky jemleýji duşuşygy geçirildi. Türkmenistanyň futbol boýunça milli ýygyndy topary Gonkongyň ýygyndysyny kabul etdi. Oňa futbol janköýerleri, köp sanly myhmanlar, ýurdumyzyň ýokary okuw mekdepleriniň, şol sanda Türkmenistanyň Daşary işler ministrliginiň Halkara gatnaşyklary institutynyň talyplary hem ruhubelentlik bilen gatnaşdylar.
Bu duşuşykda türkmen futbolçylary ak eşikde, myhmanlar bolsa gyzyl köýnekçede çykyş etdiler. FIFA-nyň referisi Abo Ýehia Huseiniň ýolbaşçylygyndaky eminler topary oýna adalatly gözegçilik etdi. Liwanly emine onuň watandaşlary — kömekçi eminler Omeirat Rabih hem-de Mokdad Ali ýardam etdiler.
Duşuşyga örän gyzykly we çekeleşikli ýagdaý mahsus boldy. Oýnuň iki tapgyrynda hem hiç bir topara garşydaş derwezä pökgi geçirmek başartmady. Bu ýagdaý goşmaça berlen 5 minutda hem üýtgemedi. Şeýlelikde, duşuşyk deňme-deň tamamlandy — 0:0.
Begnazar BEGNAZAROW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň II ýyl talyby.