735
Fransuz dili boýunça ders bäsleşiginde üstünlik gazanan mekdep okuwçylaryny sylaglamak dabarasy
2021-nji ýylyň 1-nji maýynda Türkmenistanyň Daşary işler ministrliginiň Halkara gatnaşyklary institutynyň binasynda Fransiýa Respublikasynyň Türkmenistandaky Fransuz dili okuw merkezi tarapyndan Aşgabat şäheriniň fransuz dili okadylýan orta mekdepleriniň okuwçylarynyň arasynda fransuz dili boýunça 2021-nji ýylyň 12-21-nji apreli aralygynda wideo aragatnaşyk arkaly Türkmenistanda ilkinji gezek geçirilen ders bäsleşiginiň ýeňijilerini yglan etmek we sylaglamak dabarasy geçirildi. Bu dabara Türkmenistanyň Bilim we Daşary işler ministrlikleriniň wekilleri, Fransiýa Respublikasynyň Türkmenistandaky Adatdan daşary we Doly ygtyýarly Ilçisi hanym Izabel Ginel, Ilçihananyň medeniýet işleri boýunça attaşesi, Fransuz dili okuw merkeziniň direktory jenap Roman Guwerne, merkeziň wekilleri, Türkmenistanyň Daşary işler ministrliginiň Halkara gatnaşyklary institutynyň okuw işleri boýunça prorektory Gülşat Ýusupowa, mekdep okuwçylary we Aşgabat şäheriniň orta mekdepleriniň fransuz dili mugallymlary gatnaşdylar.
Dabarany Türkmenistanyň Adatdan daşary we Doly ygtyýarly Ilçisi, Türkmenistanyň Daşary işler ministrliginiň geňeşçisi Nurberdi Amanmyradow açyp berdi we ders bäsleşiginde üstünlik gazanan mekdep okuwçylaryny gutlap, olara ýeneki üstünlikleri arzuw etdi, geljekde şular ýaly bäsleşikler Türkmenistanyň welaýatlarynda hem geçirilse oňat boljakdygyny belledi. Dabarada Fransiýa Respublikasynyň Türkmenistandaky Adatdan daşary we Doly ygtyýarly Ilçisi hanym Izabel Ginel çykyş edip, bu ders bäsleşigine Aşgabat şäheriniň orta mekdeplerinden 300-e golaý okuwçynyň gatnaşandygyny, ders bäsleşiginiň temasynyň Fransiýanyň Medeniýet ministrligi tarapyndan fransuz diliniň we Frankofoniýanyň bütindünýä 26-njy hepdesi üçin hödürlenendigini we ekologiýa temasy boýunça diktant ýazdyrylandygyny, ylham we döredijilik barada test synagynyň geçirilendigini we onlaýn görnüşde Fransuz dili okuw merkezi tarapyndan syýahat we gezelenç temasy boýunça söhbetdeşligiň guralandygyny nygtady.
3 dereje (4-5-nji synp okuwçylary; 7-8-nji synp okuwçylary; 9-njy synp okuwçylary) boýunça I, II we III orny eýelän ýeňijiler yglan edildi, olar bäsleşigiň hemaýatkärleri bolan VINCI Construction we Bouygues Turkmen kompaniýalary tarapyndan iPad planşetleri we noutbuklary, şeýle-de Kanadanyň Ankaradaky ilçihanasy, «Tissot» şweýsar sagat firmasy, «la Boutique de Paris» dükany, «La Tartine» fransuz çörek bişirilýän kärhanasy we «Dessange» gözellik salony tarapyndan sowgatlar we Türkmenistanyň Bilim ministrligi we Fransiýanyň Ilçihanasy tarapyndan gol çekilen diplomlar bilen sylaglanyldy. Fransuz dili boýunça Türkmenistanda ilkinji gezek geçirilen ders bäsleşigine gatnaşan okuwçylaryň hersine Fransiýanyň Ilçihanasy tarapyndan “Merkezi Aziýadaky fransuz dili” ýazgyly sport köýnekçesi sowgat berildi. Ähli tapawutlananlara torba we bulgur gowşuryldy. Fransiýanyň Ilçisi üstünlik gazanan türkmen okuwçylaryny mübärekläp, olary okadýan mekdep mugallymlaryna öz minnetdarlygyny bildirdi.
Türkmenistanyň Daşary işler ministrliginiň Halkara gatnaşyklary institutynyň okuw işleri boýunça prorektory Gülşat Ýusupowa öz çykyşynda Hormatly Prezidentimiziň tagallalary bilen ýaşlaryň daşary ýurt dilleriniň birnäçesini, hususan-da fransuz dilini öwrenýändiklerine we şeýle oňyn netije görkezýändiklerine begenýändigini we gutlaglaryny beýan etdi.
Dabara gutarandan soňra, Fransiýa Respublikasynyň Türkmenistandaky Adatdan daşary we Doly ygtyýarly Ilçisi we wekiliýet Türkmenistanyň Daşary işler ministrliginiň Halkara gatnaşyklary institutyndaky Türkmen diplomatiýasynyň taryhy muzeýi, şeýle-de institutyň gurluşy we alnyp barylýan işler bilen tanyşdyryldy.
Ogulbeg GAZAKOWA,
Türkmenistanyň Daşary işler ministrliginiň
Halkara gatnaşyklary institutynyň
Dünýä dilleri kafedrasynyň fransuz dili mugallymy