«Filosofiýa – ähli ylymlaryň gözbaşy» atly ylmy seminar geçirildi
2024-nji ýylyň 19-njy noýabrynda Türkmenistanyň Daşary işler ministrliginiň Halkara gatnaşyklary institutynda «Filosofiýa – ähli ylymlaryň gözbaşy» atly ylmy seminar geçirildi. Oňa institutymyzyň professor-mugallymlary, «Paýhas we parasat» ylmy gurnagynyň agzalary, bagtyýar talyp ýaşlar gatnaşdylar. Seminaryň başynda gündogaryň beýik akyldary, filosof, dana şahyr Magtymguly Pyragynyň döredijiligi bilen baglanyşykly gysga göwrümli wideofilm görkezildi. Ylmy seminary Jemgyýeti öwreniş ylymlary kafedrasynyň uly mugallymy, filosofiýa ylymlarynyň kandidaty Ogulgurban Ezimowa alyp bardy we çykyş etdi. Ol öz çykyşynda Gahryman Arkadagymyzyň, Arkadagly Gahryman Serdarymyzyň dialog, ynsanperwerlik, ynanyşmak ýaly filosofiki taglymatlarynyň we başlangyçlarynyň ylmy esaslary barada belledi. Ylmy seminaryň dowamynda Jemgyýeti öwreniş ylymlary kafedrasynyň mugallymy Dilber Hekimowa, Halkara žurnalistikasy, Halkara ykdysady gatnaşyklary fakultetleriniň talyplary çykyş etdiler. Seminarda filosofiýa ylmynyň ösüş taryhy, filosofiýada ahlaklylyk, ynsanperwerlik meseleleri, beýik filosof Magtymguly Pyragynyň döredijiliginiň ýaş nesilleri watançylyk ruhunda terbiýelemekdäki ähmiýeti, her ýylyň noýabr aýynyň üçünji penşenbesinde Bütindünýä filosofiýa gününiň bellenilmegi dogrusynda çykyşlar diňlenildi. Türkmen diplomatiýasynyň milli mekdebinde şeýle ylmy seminarlaryň yzygiderli geçirilmegi bagtyýar talyp ýaşlaryň ylymly, bilimli, giň dünýägaraýyşly, päk ahlakly nesiller bolup ýetişmekleri üçin ähmiýetiniň uludygy aýdyldy.
Seminara gatnaşyjylar okamaga, döredijilikli zähmet çekmäge, ylym bilen meşgullanmaga döredip berýän mümkinçilikleri üçin Gahryman Arkadagymyza, Arkadagly Gahryman Serdarymyza alkyş sözlerini aýtdylar.
Yhlas HALLYÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň II ýyl talyby.