Düzme bäsleşiginiň netijeleri yglan edildi
2022-nji ýylyň 16-njy dekabrynda ýurdumyzyň alyp barýan hoşniýetli daşary syýasatyny wagyz etmek we Halkara Bitaraplyk güni mynasybetli Türkmenistanyň Daşary işler ministrliginiň Halkara gatnaşyklary institutynyň garamagyndaky Ýaş diplomatlar mekdebi tarapyndan “Türkmen Bitaraplygynyň milli nusgasy: parahatçylygy döretmegiň ykrar edilen ýörelgesi” atly temasy boýunça geçirilen düzme bäsleşiginiň netijeleri yglan edildi. Bu bäsleşige ýurdumyzyň dürli künjeklerinden mekdep okuwçylarynyň 40-dan gowragy gatnaşdylar.
Eminler toparynyň gelen netijelerine görä, Maýa Kulyýewa adyndaky Türkmen milli konserwatoriýasynyň ýanyndaky ýörite-sazçylyk mekdep internatynyň 11-nji synp okuwçysy Yhlas Hallyýew I orna; Aşgabat şäherindäki Bilelikdäki türkmen-türk mekdebiniň 10-njy synp okuwçysy Mylaýym Arazgeldiýewa II orna; Balkan welaýatynyň Balkanabat şäheriniň daşary ýurt dillerini çuňlaşdyryp öwredýän umumybilim berýän ýöriteleşdirilen 2-nji orta mekdebiniň 10-njy synp okuwçysy Bägül Şanurowa III orna; şeýle hem höweslendiriji orna Mary welaýatynyň Mary şäheriniň iňlis dili we ynsançylyk ugurly okuw derslerini çuňlaşdyrylyp öwredilýän ýöriteleşdirilen welaýat mekdebiniň 8-nji synp okuwçysy Ýunus Meýlisow dagylar mynasyp boldular. Bäsleşigiň ýeňijileri Türkmenistanyň Magtymguly adyndaky Ýaşlar guramasynyň gymmat bahaly sowgatlary hem-de Türkmenistanyň Daşary işler ministrliginiň Halkara gatnaşyklary institutynyň Hormat hatlary bilen sylaglandylar.
Şasenem MEÝLISOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň I ýyl talyby,
PÝÇ-niň I möwsüminiň ýeňijisi.