Dutaryň owazy – parahatçylyk sazy
2022-nji ýylyň 14-nji fewralynda Türkmenistanyň Magtymguly adyndaky Ýaşlar guramasynyň Merkezi geňeşiniň, ÝUNESKO-nyň işleri barada Türkmenistanyň Milli toparynyň, Türkmenistanyň Medeniýet ministrliginiň we Türkmenistanyň Bilim ministrliginiň bilelikde gurnamagynda Türkmen döwlet ykdysadyýet we dolandyryş institutynda “Dutar ýasamak senetçiliginiň, dutarda saz çalmak we bagşyçylyk sungatynyň” ÝUNESKO-nyň Adamzadyň maddy däl medeni mirasynyň sanawyna girizilmegi mynasybetli dabaraly maslahat geçirildi. Oňa degişli edaralaryň wekilleri, mugallymlary we talyplary gatnaşdylar.
Maslahatyň dowamynda ÝUNESKO-nyň işleri barada Türkmenistanyň Milli toparynyň Sekretariatynyň meýletinçisi, Türkmenistanyň Daşary işler ministrliginiň Halkara gatnaşyklary institutynyň Halkara gatnaşyklary fakultetiniň IV ýyl talyby Jemal Rematullaýewa, Türkmenistanyň Magtymguly adyndaky Ýaşlar guramasynyň Aşgabat şäher geňeşiniň esasy hünärmeni Hoşgeldi Annageldiýew, Türkmen döwlet ykdysadyýet we dolandyryş institutynyň Daşary ýurt dilleri kafedrasynyň müdiri Atamyrat Garaýew, Jemgyýeti öwreniş ylymlary kafedrasynyň uly mugallymy Jemal Orazgeldiýewa we şol institutyň Ykdysadyýet we hukuk kafedrasynyň mugallymy Kerim Döwletow çykyş etdiler.
Olar Hormatly Prezidentimiziň Türkmenistanyň Milli Geňeşiniň Halk maslahatynyň nobatdan daşary mejlisinde eden taryhy çykyşynda öňde goýlan belent maksatlary nazara alyp Watanymyzy ösdürmegiň geljek döwrüni “Berkarar döwletiň täze eýýamynyň Galkynyşy” diýip atlandyrmagy teklip etmegi, milli medeniýetimiziň bahasyna ýetip bolmajak miraslaryny gorap saklamak, toplamak, öwrenmek we wagyz etmek esasy wezipedigini aýratyn belläp geçendigi, “Dutar ýasamak senetçiliginiň, dutarda saz çalmak we bagşyçylyk sungatynyň” ÝUNESKO-nyň Adamzadyň maddy däl medeni mirasynyň sanawyna girizilmegi mynasybetli ýene-de bir gezek mähriban halkymyza gutlag sözlerini aýdandygy dogrusynda giňişleýin gürrüň berdiler. Şeýle hem Hormatly Prezidentimiziň milli mirasymyzyň halkara abraýyny, mertebesini has hem beýgeltmek ugrunda nusga alarlyk görelde mekdebinden ugur alyp, geljekde türkmen halkynyň gaýtalanmajak, özüne çekiji milli gymmatlyklaryny baýlaşdyrmak, inçe syrlar bilen gurşalan naýbaşy sungatlaryny içgin öwrenmek we olary dünýä ýaýyp, halkara derejesinde ykrar edilmegini gazanmak ýaşlaryň öňünde duran möhüm wezipedigi aýratyn nygtaldy.
Dabaraly maslahat institutyň “Hazyna” döredijilik toparynyň sazandalarynyň ýokary ussatlyk bilen ýerine ýetiren aýdym-sazlary bilen utgaşyp, oňa gatnaşyjylarda uly täsir galdyrdy.
Maslahata gatnaşanlar türkmen halkynyň milli mirasynyň dünýä giňişligindäki abraýyny, mertebesini belende göterýän Gahryman Arkadagymyza alkyş sözlerini aýtdylar.
Jemal Rematullaýewa,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň IV ýyl talyby.