576
Durnukly ösüş maksatlaryna bagyşlanan okuw sapagy
2021-nji ýylyň 18-nji fewralynda Aşgabat şäheriniň 21-nji ýöriteleşdirilen terbiýeçilik-okuw mekdebinde Durnukly ösüş maksatlaryna bagyşlanan okuw sapagy guraldy. Durnukly ösüş maksatlary boýunça ylmy-usulyýet merkezi tarapyndan gurnalan okuw sapagyna Durnukly ösüş maksatlarynyň ýaş ilçileri, şeýle hem bu mekdebiň okuwçylary gatnaşdylar.
Ýaş ilçiler tarapyndan alnyp barlan sapagyň barşynda durnukly infrastrukturany döretmäge, inklusiw senagatlaşdyrmaga we innowasiýalara ýardam bermäge gönükdirilen Durnukly ösüş maksatlarynyň 9-njy maksadyna aýratyn üns berildi. Okuw sapagynyň dowamynda 9-njy maksadyň iş ýüzünde amala aşyrylmagynyň ähmiýeti anyk mysallar arkaly açylyp görkezildi.
Hususan-da, sapakda ýaş ilçiler inklusiw senagatlaşmanyň we innowasiýalaryň täze tehnologiýalary ornaşdyrmakda we ösdürmekde, halkara söwdasyny ilerletmekde we tebigy çeşmelerden tygşytly peýdalanmakda möhüm ähmiýetini nygtadylar.
Maslahatyň ahyrynda Durnukly ösüş maksatlarynyň ýaş ilçileriniň öz başarnyklaryny açyp görkezmekleri üçin döredýän ajaýyp mümkinçilikleri üçin hormatly Prezidentimize alkyş sözlerini aýtdylar.
Diýar LOMANOW,
Türkmenistanyň Daşary işler Ministrliginiň
Halkara gatnaşyklary institutynyň talyby,
Durnukly ösüş maksatlarynyň ýaş ilçisi.