Durnukly ösüş maksatlary boýunça okuw sapaklarynyň nobatdaky tapgyry geçirildi
2022-nji ýylyň 3-nji maýynda 2021-2022-nji okuw ýyly üçin ylalaşylan okuw maksatnamasyna laýyklykda Türkmenistanyň Daşary işler ministrliginiň Halkara gatnaşyklary institutynyň Durnukly ösüş maksatlary boýunça ylmy-usulyýet merkezinde Aşgabat şäherinde ýerleşýän orta mekdepleriniň mugallymlarynyň, şeýle hem institutyň talyplarynyň gatnaşmagynda Durnukly ösüş maksatlary boýunça okuw sapaklarynyň nobatdaky tapgyry geçirildi. Nobatdaky okuw tapgyrynyň dowamynda Ýagşygeldi Kakaýew adyndaky Halkara nebit we gaz uniwersitetiniň, Türkmenistanyň Senagat we gurluşyk önümçiligi ministrliginiň, Türkmenistanyň Hazar deňzi institutynyň wekilleri degişlilikde Durnukly ösüş maksatlarynyň 7-nji maksady, Elýeter we arassa energiýa, Durnukly ösüş maksatlarynyň 9-njy maksady, Senagatlaşdyrma, innowasiýalar we infrastruktura, Durnukly ösüş maksatlarynyň 14-nji maksady, Deňiz ekologik ulgamyny gorap saklamak boýunça çykyş etdiler.
Okuw sapagynyň dowamynda çykyş edenler energiýa howpsuzlygy, onuň adamzat durmuşynda eýelän orny, deňiz ekologik ulgamyny gorap saklamagyň, howanyň üýtgemegine garşy göreşmegiň we oňa uýgunlaşmagyň we ykdysady ösüşiň aýratyn ähmiýetini nygtadylar. Şeýle hem, bu ugurlar boýunça ýurdumyzda hormatly Prezidentimiziň parasatly ýolbaşçylygynda alnyp barylýan nusgalyk işler we ýetilen ägirt uly sepgitler barada giňişleýin gürrüňdeşlik geçirildi. Okuw sapagynyň ahyrynda oňa gatnaşanlara özlerini gyzyklandyrýan soraglary soramaga we degişli jogaplary almaga giň mümkinçilik döredildi.
Okuw sapagynyň ahyrynda oňa gatnaşyjylar hormatly Prezidentimize döredip berýän ajaýyp mümkinçilikleri üçin alkyş sözlerini aýtdylar.
Gapbar HALLYÝEW,
Türkmenistanyň Daşary işler ministrliginiň
Halkara gatnaşyklary institutynyň mugallymy