DOSTLUKLY GATNAŞYKLARA BAGYŞLANAN OKUW SAPAGY
2025-nji ýylyň 13-nji oktýabrynda Türkmenistanyň Daşary işler ministrliginiň Halkara gatnaşyklary institutynda Türkmenistanyň we Russiýa Federasiýasynyň arasyndaky dostlukly gatnaşyklara bagyşlanan okuw sapagy geçirildi. Okuw sapagyny Russiýa Federasiýasynyň E.M.Primakow adyndaky Russiýa ylymlar akademiýasynyň Dünýä ykdysadyýeti we halkara gatnaşyklary institutynyň, A.M.Gorçakow adyndaky jemgyýetçilik diplomatiýasy gaznasynyň hem-de Ýaşlar diplomatiýasy akademiýasynyň wekilleri geçirdiler. Oňa institutymyzyň professor-mugallymlary we talyplary gatnaşdylar.
Okuw sapagyň dowamynda Russiýa Federasiýasynyň E.M.Primakow adyndaky Russiýa ylymlar akademiýasynyň Dünýä ykdysadyýeti we halkara gatnaşyklary institutynyň ylmy işler boýunça direktorynyň orunbasary Iwan Danilin, Post-Sowet barlaglary merkeziniň başlygy Eduard Solowýew, A.M.Gorçakow adyndaky jemgyýetçilik diplomatiýasy gaznasynyň direktorynyň orunbasary Wiktoriýa Karsliýewa hem-de Ýaşlar diplomatiýasy akademiýasynyň başlygy Dilbar Sadykowa Türkmenistan bilen Russiýa Federasiýasynyň arasyndaky gatnaşyklaryň, medeni-ynsanperwer ulgamlarynda ikitaraplaýyn we köptaraplaýyn hyzmatdaşlygyň has-da ösýändigi hem berkeýändigi barada belläp geçdiler.
Okuw sapagynyň ahyrynda talyplar Russiýa Federasiýasynyň ýokary okuw mekdepleriniň wekillerinden Türkmenistan bilen Russiýa Federasiýasynyň arasyndaky dostlukly we özara bähbitli hyzmatdaşlygy has-da ösdürmäge gönükdirilen sowallara jogap aldylar.
Guwanç ALIÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň II ýyl talyby.