633
DÖREDIJILIK DUŞUŞYGY
2021-nji ýylyň 18-nji martynda Türkmenistanyň Daşary işler ministrliginiň Halkara gatnaşyklary institutynyň Jemgyýetçilik guramalary, Žurnalistikanyň nazaryýeti we amalyýeti kafedrasynyň “Ýaş žurnalistler” ylmy-döredijilik gurnagy tarapyndan okuwçy we talyp gyzlaryň arasynda "El hünäri - il gezer" atly döredijilik duşuşygy geçirildi. Onuň maksady "Türkmenistanda ýaşlar baradaky döwlet syýasatynyň 2021-2025-nji ýyllar üçin Döwlet maksatnamasyny amala aşyrmak boýunça ýerine ýetirilmeli çäreleriň Meýilnamasyny" durmuşa geçirmekden ybarat boldy. Duşuşyk institutyň döredilen güni hem-de Halkara Nowruz baýramyna bagyşlanyp, talyplary milli däp-dessurlara, ene-mamalardan gelýän ýörelgelere sarpa goýmak ruhunda terbiýelemeklige gönükdirildi. Duşuşyga Aşgabat şäherindäki ýöriteleşdirilen 21-nji okuw-terbiýeçilik mekdebiň, daşary ýurt dillerini çuňlaşdyryp öwredýän ýöriteleşdirilen 37-nji orta mekdebiň okuwçylary, şeýle hem, Halkara žurnalistikasy fakultetiniň professor-mugallymlary we talyp ýaşlary gatnaşdy. Duşuşygyň dowamynda Ahal welaýatynyň Bäherden etrabynyň Annaberdi Atdanow adyndaky 1-nji orta mekdebiň mugallymy Artykjemal Annaöwezowa hem-de Halkara žurnalistikasy fakultetiniň talyplary öz düzen goşgulary we çeper okaýyşlary bilen çykyş etdiler. Duşuşykda edilen gyzykly çykyşlar, ýaňlanan ajaýyp aýdym-sazlar oňa gatnaşyjylarda ýakymly täsirleri galdyrdy.
Gurbanjemal EGIRJÄÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň II ýyl talyby