Döredijilik duşuşygy geçirildi
2022-nji ýylyň 26-njy noýabrynda Türkmenistanyň Daşary işler ministrliginiň Halkara gatnaşyklary institutynyň Žurnalistikanyň nazaryýeti we amalyýeti kafedrasy «Ýaş žurnalistler» ylmy-döredijilik gurnagy bilen bilelikde guramagynda ýurdumyzyň döredijilik işgärleri bilen duşuşyk geçirildi. Duşuşygyň myhmanlary hökmünde «Miras» teleradioýaýlymynyň gepleşikleri gurnaýjylary we taýýarlaýjylary Tyllagözel Ýusupowa bilen Köşüli Annaseýidow gatnaşdy.
Myhmanlar özleriniň ençeme ýyllaryň dowamynda gazanan iş tejribeleri hakynda gyzykly gürrüňleri berdiler. Olar söhbetleriniň dowamynda hormatly Prezidentimiziň alyp barýan içeri we daşary syýasatyny açyp görkezýän gepleşikler, şeýle hem Magtymguly Pyragynyň 300 ýyllygy mynasybetli taýýarlanylýan edebi-çeper gepleşikler dogrusynda aýratyn belläp geçdiler. Myhmanlar duşuşygyň dowamynda Magtymguly Pyragynyň goşgularyndan hem okap berdiler. Duşuşygyň barşynda institutyň talyplary halypalara žurnalistika, döredijilik babatda özlerini gyzyklandyrýan sowallaryny berdiler. Duşuşygyň ahyrynda geljekki žurnalistler halypalar bilen ýadygärlik surata düşdiler.
Bägül KAKALYÝEWA,
Türkmenistanyň Daşary işler ministrliginiň
Halkara gatnaşyklary institutynyň II ýyl talyby.