10/12/2023
1001
Diplomatlar sport ýaryşlarynda ýokary işjeňlik görkezdiler
2023-nji ýylyň 9-10-njy dekabrynda Türkmenistanyň Daşary işler ministrliginiň Halkara gatnaşyklary institutynda Türkmenistanyň hemişelik Bitaraplygynyň 28 ýyllygy mynasybetli Daşary işler ministrliginiň, daşary ýurtlaryň Aşgabatdaky diplomatik missiýalarynyň we halkara guramalaryň wekilhanalarynyň wekilleriniň gatnaşmagynda sport ýaryşlary geçirildi. Oňa diplomatik gullugyň işgärleri bilen birlikde, köp sanly myhmanlar, habar beriş serişdeleriniň wekilleri hem gatnaşdylar.
Diplomatlaryň arasyndaky ýaryşlar sportuň iki görnüşi — woleýbol we küşt boýunça geçirildi. Diplomatik gulluklaryň wekilleri bu ýaryşlarda ýokary işjeňlik görkezmek bilen, özleriniň sport ussatlygyny hem subut etdiler. Munuň özi sportuň parahatçylylygyň ilçisidigini ýene-de bir gezek aýdyňlygy bilen görkezdi.
Mälim bolşy ýaly, ýurdumyz sport çygrynda halkara guramalary we dünýä döwletleri bilen ikitaraplaýyn hem-de köptaraplaýyn hyzmatdaşlygy giňeldýär. Dünýäniň sport giňişliginde sagdyn durmuş ýörelgesini wagyz etmekde Türkmenistanyň başlangyçlary örän uludyr. Şu gezekki sport ýaryşlary hem munuň şeýlediginiň aýdyň subutnamasydyr.
Akyl-paýhas oýny hasaplanýan sportuň küşt görnüşi boýunça geçirilen ýaryşlarda 1-nji orna Amerikanyň Birleşen Ştatlarynyň Türkmenistandaky Ilçihanasynyň işgäri Kuwwat Reýimberdiýew, 2-nji orna Gazagystanyň Türkmenistandaky Ilçihanasynyň wekili Çingiz Kakenow, 3-nji orna bolsa Türkmenistanyň Ýaponiýadaky Adatdan daşary we Doly ygtyýarly ilçisi Atadurdy Baýramow mynasyp boldy.
Woleýbol ýaryşlarynyň ýeňijileri şeýle kesgitlendi:
1-nji orun — Amerikanyň Birleşen Ştatlarynyň Türkmenistandaky Ilçihanasy;
2-nji orun — Türkmenistanyň Daşary işler ministrligi;
3-nji orun — Russiýa Federasiýasynyň Türkmenistandaky Ilçihanasy.
Sport ýaryşlarynda ýeňiji bolan diplomatlara hem-de diplomatik wekilhanalara Hormat hatlary we ýadygärlik sowgatlary dabaraly ýagdaýda gowşuryldy.
Leýli MURADOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň I ýyl talyby.