Diplomatik etiket boýunça geçirilen okuw sapagy
2023-nji ýylyň 13-nji iýulynda paýtagtymyzyň “Ýyldyz” myhmanhanasynda diplomat bolmagyň etiki ýörelgelerine bagyşlanan okuw sapagy geçirildi. Bu okuw sapagy Halkara gatnaşyklary fakultetiniň 1-nji ýyl talyplarynyň okuw tejribeliginiň çäginde guraldy.
Okuw sapagy meşhur myhmanhananyň direktory Hajymuhammet Seýidow tarapyndan alnyp baryldy. Okuw sapagynyň barşynda H.Seýidow talyplara diplomatik protokol we halkara etiketiniň umumy ykrar edilen ýörelgeleri, daşary ýurtly myhmanlary garşylamagyň tertip-düzgünleri, restoranda we stol başynda özüňi alyp barmagyň kadalary, şeýle hem kabul edişlikleri guramagyň esaslary barada täsirli gürrüň berdi. Duşuşygyň ahyrynda talyplar H.Seýidowa özlerini gyzyklandyrýan soraglary berip, degişli jogaplary aldylar.
Okuw tejribeliginiň dowamynda şeýle amaly sapaklaryň yzygiderli guralmagy tejribe geçýän talyplara özleriniň hünärlerini has hem içgin öwrenmeklerine giňden ýardam edýär.
Hojamyrat BAÝLYÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň
I ýyl talyby.