Diller – dostluk köprüsi
2022-nji ýylyň 21-nji dekabrynda Döwletmämmet Azady adyndaky Türkmen milli dünýä dilleri institutynda “Türkmenistanda daşary ýurt dillerini okatmagy kämilleşdirmegiň Konsepsiýasyny” we “Sanly bilim ulgamyny ösdürmegiň Konsepsiýasyny” durmuşa geçirmegiň meýilnamasynyň çäklerinde ýurdumyzyň ýokary okuw mekdepleri bilen hyzmatdaşlygyň “Diller – dostluk köprüsi” atly iki aýlygyň meýilnamasynyň çäklerinde “Dillerde dünýä medeniýetiniň gözelligi” atly baýramçylyk konserti geçirildi. Konsertde Türkmenistanyň ýokary okuw mekdepleriniň talyp ýaşlary dürli dünýä dillerinde çykyşlary görkezdiler. Geçirilen konsertiň başynda “Diller – dostluk köprüsi” atly iki aýlygyň çäklerinde geçirilen çärelerde işjeňlik görkezip ýeňiş gazanan talyp ýaşlary hem-de mugallymlary sylaglamak dabarasy boldy. Bu dabarada biziň ýokary okuw mekdebimiziň hem talyplary, mugallymlary degişli sylaglara mynasyp boldular. Has takygy, şu ýylyň 9-njy noýabrynda “Dilleri öwretmegiň netijeliligini nädip ýokarlandyrmaly?” atly gurnalan pikir çekişmede işjeňlik görkezenligi üçin Türkmenistanyň Daşary işler ministrliginiň Halkara gatnaşyklary institutynyň mugallymy Nazar Niýazow sertifikat bilen sylaglandy. 17-nji noýabrda Türkmenistanyň Döwlet medeniýet merkeziniň Döwlet muzeýinde geçirilen “Ülkämiň gymmatlyklary” atly bäsleşikde I orna mynasyp institutymyzyň talyplar topary, ýagny, Halkara gatnaşyklary fakultetiniň 3-nji ýyl talyby Akgözel Rasulowa, Halkara žurnalistikasy fakultetiniň 1-nji ýyl talyby Berdigylyç Ýazmyradow hem-de Halkara ykdysady gatnaşyklary fakultetiniň 1-nji ýyl talyby Mahym Kakaýewa sertifikat bilen sylaglandylar. “Dilleri öwretmekde we öwrenmekde tejribeçi ýaşlaryň gazananlary” atly ylmy-amaly maslahat geçirildi. Oňa institutymyzyň Halkara žurnalistikasy fakultetiniň 2-nji ýyl talyby Batyrmuhammet Orazow we Halkara hukugy fakultetiniň 1-nji ýyl talyby Intizar Tagannyýazowa üstünlikli gatnaşyp, hormat hatlary bilen sylaglandylar. Mundan daşary, şu ýylyň 17-nji dekabrynda “Dilleri öwretmegiň milli we halkara tejribesi” atly ylmy-amaly maslahat geçirilip, oňa institutymyzyň Dünýä dilleri kafedrasynyň uly mugallymy Mähriban Gelenowa gatnaşyp, hormat haty bilen sylaglandy.
Biz hem öz gezegimizde talyp deň-duşlarymyzy we mugallymlarymyzy gazanan üstünlikleri bilen gutlap, geljekde hem olara döredijilik äleminde uly üstünlikleriň ýaran bolmagyny arzuw edýäris.
Mahym NARMYRADOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň I ýyl talyby.