Dilewarlyk sungaty – liderligiň binýady
2023-nji ýylyň 24-nji maýynda Türkmenistanyň Daşary işler ministrliginiň Halkara gatnaşyklary institutynda «Ýaş Liderlik» hepdeliginiň dowamynda Jemgyýeti öwreniş ylymlary kafedrasynyň «Paýhas we parasat» gurnagynyň, ÝUNESKO klubynyň we Talyplar geňeşiniň bilelikde gurnamagynda «Dilewarlyk sungaty – liderligiň binýady» atly bäsleşik geçirildi. Bäsleşige institutyň mugallymlarydyr talyplary gatnaşdylar.
Bäsleşigiň şerti boýunça oňa gatnaşyjylar belli bir temany saýlap alyp, 5 minutyň dowamynda diňleýji talyplaryň we eminler toparynyň öňünde prezentasiýa bilen çykyş etdiler. Bäsleşige gatnaşyjylaryň çykyşlary ynandyryjylygy boýunça bahalandyryldy. Bäsleşigiň netijeleri diňleýji talyplaryň we eminler toparynyň obýektiw ses bermekleri bilen jemlendi. Oňa laýyklykda Halkara žurnalistikasy fakultetiniň 1-nji ýyl talyby Kakageldi Akmyradow bäsleşigiň ýeňijisi bolmagy başardy.
Çekeleşikli geçen bäsleşigiň ahyrynda emin agzalar şeýle geçirilýän bäsleşikleriň talyplaryň özlerinde dilewarlyk sungatyny ösdürmekleri, belli bir mesele bilen bagly täzeçe garaýyşlary, çözgütleri öwrenmekleri we geljekki halkaraçy hünärmenler hökmünde talyplaryň ynandyryjylyk, liderlik, sabyrlylyk, paýhaslylyk ýaly diplomatik ukyplaryny güýçlendirmekleri üçin uly ähmiýete eýedigini belläp geçdiler.
Dilnoza MUHADOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň III ýyl talyby.