“Dialog - parahatçylygyň kepili” atly maslahat
Türkmenistanyň Daşary işler ministrliginiň Halkara gatnaşyklary institutynyň Jemgyýeti öwreniş ylymlary we Halkara ykdysady gatnaşyklary kafedralary tarapyndan institutyň mugallymlarynyň we talyplarynyň gatnaşmagynda 2022-nji ýylyň 31-nji martynda “Dialog – parahatçylygyň kepili” atly maslahat geçirildi. Bu maslahat 2021-nji ýylyň 11-nji dekabrynda Aşgabat şäherinde geçirilen “Parahatçylyk we ynanyşmak syýasaty – halkara howpsuzlygyň, durnuklylygyň we ösüşiň binýady” atly halkara maslahatynyň çäklerinde Türkmenistanyň Prezidenti tarapyndan teklip edilen “Dialog – parahatçylygyň kepili” diýen ählumumy başlangyjy dogrusynda guraldy. Maslahatda Jemgyýeti öwreniş ylymlary kafedrasynyň müdiriniň wezipesini ýerine ýetiriji, uly mugallym, filosofiýa ylymlarynyň kandidaty Ogulgurban Ezimowa parahatçylygyň giň many-mazmuny, onuň ähmiýeti we ýurdumyzda parahatçylyk syýasatynyň alnyp barlyşy dogrusynda çykyş etdi. Şeýle hem, Halkara ykdysady gatnaşyklary kafedrasynyň mugallymy Mährijemal Mämmedowa we Türkmenistanyň Demokratik partiýasynyň Bagtyýarlyk etrap komitetiniň partiýa guramaçysy Şirin Mirmedowa çykyş etdiler. Çykyş edenler Berkarar döwletimiziň täze eýýamynyň Galkynyşy döwründe parahatçylygyň tutýan orny, ony ösdürmekde we alyp barmakda edilýän işler barada gürrüň etdiler. Maslahatyň dowamynda Türkmenistanyň Milli Geňeşiniň Halk Maslahatynyň Başlygy, Gahryman Arkadagymyzyň goşgulary okaldy. “Ýaşasyn parahat durmuş” atly goşgusyny Halkara gatnaşyklary fakultetiniň bakalawr ugry boýunça 1-nji ýyl talyby Batyr Esenow hem-de “Jan Watanym Türkmenistan” atly goşgusyny Halkara gatnaşyklary fakultetiniň 1-nji ýyl talyby Arslan Syýahatow labyzly ýerine ýetirdiler. Maslahatyň ahyrynda oňa gatnaşanlar tarapyndan ýurdumyzda parahatçylygyň we halkara dost-doganlyk gatnaşyklarynyň alnyp barylýandygyna hoşallyk sözleri aýdyldy.
Şeker BATYROWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň I ýyl talyby.