"Dialog – parahatçylygyň kepili: adamzat gymmatlyklaryna esaslanýan, anyk kesgitlenen syýasy ölçeg" atly maslahat
2022-nji ýylyň 7-nji maýynda Türkmenistanyň Daşary işler ministrliginiň Halkara gatnaşyklary institutynda «Dialog – parahatçylygyň kepili: adamzat gymmatlyklaryna esaslanýan, anyk kesgitlenen syýasy ölçeg» atly maslahat geçirildi.
Maslahatda Türkmenistanyň Daşary işler ministrliginiň Halkara gatnaşyklary institutynyň rektory Jumamyrat Gurbangeldiýew, Türkmenistanyň Milli Geňeşiniň Halk Maslahatynyň Halkara meseleler baradaky komitetiniň başlygy Mähri Bäşimowa, Türkmenistanyň Milli Geňeşiniň Mejlisiniň Halkara we parlamentara aragatnaşyklar baradaky komitetiniň başlygy Merdan Tuwakow, Türkmenistanyň Demokratik partiýasynyň başlygy Ata Serdarow, Türkmenistanyň Magtymguly adyndaky Ýaşlar guramasynyň Merkezi Geňeşiniň başlygy Ýazmuhammet Öwezberdiýew, Türkmen döwlet binagärlik-gurluşyk institutynyň uly mugallymy Amangeldi Orazow, Türkmenistanyň Daşary işler ministrliginiň Halkara gatnaşyklary institutynyň dosenti Çary Nyýazow hem-de institutyň Halkara žurnalistikasy fakultetiniň I ýyl talyby Mätgurban Mätgurbanow çykyş etdiler.
Çykyşlarda bellenilişi ýaly, Gahryman Arkadagymyz 2021-nji ýylyň 11-nji dekabrynda paýtagtymyzyň Maslahatlar merkezinde geçirilen «Parahatçylyk we ynanyşmak syýasaty — halkara howpsuzlygyň, durnuklylygyň we ösüşiň binýady» atly halkara maslahatynda eden taryhy çykyşynda öňe süren «Dialog — parahatçylygyň kepili» atly täze filosofiýasy dessine tutuş dünýäde uly goldawa eýe boldy. Gahryman Arkadagymyzyň öňe süren täze parahatçylyk filosofiýasynyň ikitaraplaýyn we köpugurly halkara gatnaşyklarynda ileri tutulýan ugurlar boýunça özara bähbitlere laýyk çözgütleri gazanmakda möhüm ähmiýete eýe bolup durýar. Çünki, Dialog — anyk kesgitlenen sagdyn syýasy ölçeglere, umumy ykrar edilen hem-de hemmelere düşnükli adamzat gymmatlyklaryna esaslanýan halkara gatnaşyklaryň ösdürilmegine oňyn täsir edýän gaýragoýulmasyz şert hökmünde çykyş edýär. Häzirki wagtda Türkmenistan parahatçylygy, abadançylygy we durnukly ösüşi goldamak syýasatyny üstünlikli amala aşyryp, dünýä döwletleri bilen özara bähbitli gatnaşyklary yzygiderli ösdürýär hem-de adamzadyň wajyp meseleleriniň netijeli çözgütlerine saldamly goşant goşýar.
Maslahatyň ahyrynda oňa gatnaşyjylar ýurdumyzda we dünýäde parahatçylygy we howpsuzlygy saklamakda alyp barýan parasatly daşary syýasaty üçin Gahryman Arkadagymyza, hormatly Prezidentimize hoşallyk sözlerini aýtdylar.
Merjen GURBANNAZAROWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy we deňeşdirme hukuk
öwreniş
kafedrasynyň uly mugallymy.