«Demirgazyk – Günorta» ulag geçelgesini işjeňleşdirmekde Hindistanyň öňe sürýän taslamalary atly seminar geçirildi
2022-nji ýylyň 23-nji dekabrynda Türkmenistanyň Daşary işler ministrliginiň Halkara gatnaşyklary institutynda hereket edýän Türkmenistanyň diplomatiýasynyň möhüm ugurlary boýunça okuw Merkeziniň çäklerinde (TDMUOM) Türkmenistanyň Hindistan Respublikasyndaky Adatdan daşary we Doly ygtyýarly Ilçisi Şalar Geldinazarow bilen institutymyzyň talyplarynyň gatnaşmagynda «Demirgazyk – Günorta» ulag geçelgesini işjeňleşdirmekde Hindistanyň öňe sürýän taslamalary atly seminar geçirildi.
2022-nji ýylyň 5-nji iýulynda «Demirgazyk ― Günorta» halkara ulag geçirijisi boýunça ilkinji synag ýük otlusynyň Moskwanyň golaýyndaky Çehow etrabyndan Hindistanyň Mumbaý şäherindäki Nawa Şewa portuna ugradyldy.
Tejribeli Ilçi Türkmenistanyň üstünden geçjek «Demirgazyk ― Günorta» halkara üstaşyr geçiriş ulgamy boýunça yzygiderli ýük daşamak hyzmatynyň ýola goýulandygy barada belläp geçdi. Täze taslama gatnaşyjy ähli döwletleriň ― Russiýanyň, Gazagystanyň, Türkmenistanyň, Eýranyň, Hindistanyň birleşen tagallalary netijesinde 2 million, 2025-nji ýyla çenli bolsa her ýyl 5 million tonna ýüki daşamaga mümkinçilik berjekdigi barada giňişleýin gürrüň berdi. Bu taslama diňe bir Hindistana täze söwda ýollaryny açman, eýsem, Pars aýlagy, Afrika we Aziýa ýurtlaryna hem haryt ibermäge mümkinçilik berer. Şeýle-de, Ilçi ulag geçelgesiniň üstünlikli işlemegi üçin eksportçylara ykdysady taýdan bäsdeşlik etmäge mümkinçilik berjek ykdysady ugurlar boýunça şuňa meňzeş ugurlara uýgunlaşdyrylan nyrhlaryň ähmiýeti dogrusynda giňişleýin gürrüň berdi.
Täsirli geçen bu okuw seminary talyplar üçin örän täsirli bolup, olar özlerini gyzyklandyrýan sowallara giňişleýin jogap aldylar.
Meýlis SADYKOW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň talyby.