Türkmenistanyň wekiliýeti Ýaponiýanyň Halkara gatnaşyklary institutynda duşuşyk geçirdi
2023-nji ýylyň 27-nji aprelinde Tokioda Türkmenistanyň Daşary işler ministrliginiň Halkara gatnaşyklary institutynyň rektory Jumamyrat Gurbangeldiýew bilen Ýaponiýanyň Halkara gatnaşyklar institutynyň Baş direktory, professor Tomiko Içikawanyň arasynda geçirilen duşuşykda akademiki hyzmatdaşlygy we ylmy gatnaşyklary pugtalandyrmak meselesi ara alnyp maslahatlaşyldy. Duşuşyga Türkmenistanyň Ýaponiýadaky Ilçisi A.Baýramow we iki tarapyň wekilleri hem gatnaşdylar.
Taraplar pikir alyşmagyň dowamynda akademiki we ylmy hyzmatdaşlygyň mümkinçiliklerini, geljegi uly bolan ugurlarda konstruktiw we özara bähbitli hyzmatdaşlygy ýola goýmagy ara alyp maslahatlaşdylar. Bu jähtden, bilelikdäki onlaýn okuwlary, ylmy we akademiki alyş-çalyşlary, bilermenleriň derejesinde gepleşikleri ýola goýmagyň we ylmy-barlag neşirleriň çykarylyşyny guramagyň mümkinçilikleriň üstünde durlup geçildi.
2023-nji ýyl Türkmenistanda «Arkadag Serdarly bagtyýar ýaşlar ýyly» diýlip yglan edildi. Türkmenistanda alnyp barylýan özgertmelerde ýaşlaryň ornuna aýratyn ünsi çekmegi maksat edinýän ýylyň şygary ýurdumyzyň bu meseleler boýunça halkara gatnaşyklardaky garaýyşlaryna gabat gelýär.
Duşuşykda ýaşlar syýasatynyň durmuşa geçirilmegine-de aýratyn üns berildi. Ýaşlaryň halkara gatnaşyklarynda tutýan ornunyň artmagyna we Türkmenistanda ýaşlaryň hyzmatdaşlyk Strategiýasyny durmuşa geçirmek üçin görülýän çärelere aýratyn ähmiýet berildi.
Watanyň mundan beýläkki durnukly we hemmetaraplaýyn durmuş-ykdysady ösüşinde, onuň dünýä giňişligindäki öňdebaryjy ornuny berkitmekde ägirt uly kesgitleýji ornuň ýaşlara degişlidigini göz öňünde tutmak bilen, ýurdumyzda ýaşlar milli we döwlet bähbitleriniň ileri tutulýan ugry hasaplanylýar.
Hormatly Prezidentimiziň alyp barýan ýaşlar syýasaty jemgyýetiň we döwletiň bähbidine ýaş türkmen raýatlarynyň ösmegi we kämilleşmegi, olaryň aň-bilim, döredijilik we ruhy mümkinçilikleriniň giňeldilmegi üçin amatly şertleri döretmäge gönükdirilendir.
Taraplar ýaşlar syýasaty meselelerinde mundan beýläk-de hyzmatdaşlyk etmek we bu ugurda tejribe alyşmak üçin gatnaşyklary ýola goýmak barada ylalaşdylar.
Bellenilişi ýaly, Türkmenistan bilen Ýaponiýanyň halkara gatnaşyklary we diplomatiýa ugurly iki öňdebaryjy bilim edralarynyň ýolbaşçylarynyň duşuşygy iki ýurduň arasyndaky hyzmatdaşlygy we gatnaşyklary pugtalandyrmakda möhüm ädim boldy.
Bu hakda şu ýerden hem
okap bilersiňiz:
https://turkmenistan.gov.tm/en/post/71870/development-turkmen-japanese-cooperation-field-education-was-discussed-capital-japan
https://mfa.gov.tm/tk/articles/827