Daşary ýurtlardaky rus dili mugallymlary üçin gurnalan usuly çäreleriň nobatdaky tapgyry tamamlandy

01/11/2023

1379

Daşary ýurtlardaky rus dili mugallymlary üçin gurnalan usuly çäreleriň nobatdaky tapgyry tamamlandy

Rushyzmatdaşlyk agentligi we Halkara zähmeti goramak instituty daşary ýurtlardaky, şol sanda, Türkmenistanyň rus dili mugallymlary üçin «Rus dilini daşary ýurt dili hökmünde okatmak boýunça kurs okuwlarynyň gurnalyşy» atly uzak aralykdan usuly çäreleri geçirdiler. Bu okuw maksatnamasy «Okuw işini guramagyň aýratynlyklary: gysga möhletli we intensiw okuwlar», «Rus dilini öwretmegiň intensiw usullary», «Okuw we aýratyn okuw üçin bilim we usulyýet edebiýaty», «Okuw sapaklarynda elektron bilim çeşmelerini ulanmak» ýaly modullary öz içine aldy.
2023-nji ýylyň 21- 28-nji oktýabry aralygynda Türkmenistanyň Daşary işler ministrliginiň Halkara gatnaşyklary institutynyň Dünýä dilleri kafedrasynyň rus dili mugallymy Tylla Babaýewa usuly çäreleriň üçünji tapgyryna gatnaşyp, hünär derejesini kämilleşdirmek boýunça okuwlary geçdi. Daşary ýurtlardaky rus dili mugallymlary üçin gurnalan Taslamanyň onlaýn meýdançasy 300-den gowrak rus dili mugallymylaryny bir ýere jemledi.
Hepdäniň dowamynda daşary ýurtly rus dili hünärmenleri rus dilini öwretmegiň intensiw usullarynyň aýratynlyklaryny öwrendiler, kurs okuwlaryny guramagyň we elektron bilim çeşmelerini ulanmagyň häzirki meselelerini ara alyp maslahatlaşdylar.
Taslama gatnaşyjylar rus dilini okatmaga niýetlenen täze usuly işläp taýýarlamalar we döwrebap usuly edebiýatlar bilen tanyşdylar.
Usulyýet çäreleriniň jemleri boýunça gatnaşyjylara şahadatnamalar iberildi.
Aýna SÄTGELDIÝEWA,
Türkmenistanyň Daşary işler ministrliginiň
Halkara gatnaşyklary institutynyň
Dünýä dilleri kafedrasynyň uly mugallymy.