“DAŞARY ÝURT DILLERINI OKATMAKDA PREZENTASIÝALARYŇ ORNY” ATLY OKUW-USULY MASLAHAT
Häzirki wagtda, daşary ýurt dillerini bilmezden, kämil derejeli hünärmen bolup ýetişmek mümkin hem däl. Çünki üçünji müňýyllyk adamzat taryhynda ylym-bilimiň we tehnikanyň örän çalt depginler bilen ösýän zamanasy boldy. Gahryman Arkadagymyzyň başyny başlan, hormatly Prezidentimiziň dowam edýän öňdengörüjilikli syýasaty netijesinde ýurdumyzda ylym-bilim ulgamy döwrüň ösen talaplaryna laýyk derejede toplumlaýyn we sazlaşykly ösdürilýär.
2023-nji ýylyň 14-nji iýulynda Türkmenistanyň Daşary işler ministrliginiň Halkara gatnaşyklary institutynda “Gujurly bilim merkezi” hojalyk jemgyýeti bilen Türkmenistanyň Daşary işler ministrliginiň Halkara gatnaşyklary institutynyň bilelikde gurnamagynda “Daşary ýurt dillerini okatmakda prezentasiýalaryň orny” atly okuw-usuly maslahat geçirildi. Maslahata Türkmenistanyň Daşary işler ministrliginiň Halkara gatnaşyklary institutynyň okuw işleri boýunça prorektory G.Ýusupowa hem-de Dünýä dilleri kafedrasynyň mugallymlary gatnaşdylar.
Türkmenistanda daşary ýurt dillerini okatmagy kämilleşdirmegiň Konsepsiýasyny durmuşa geçirmek maksady bilen, daşary ýurt dilleriniň okadylyş aýratynlyklarynyň biri barada geçirilen maslahatda “Gujurly bilim merkezi” hojalyk jemgyýetiniň okuw-usulyýet işleri boýunça müdiriniň orunbasary M.Amanýazow “Prezentasiýa taýýarlamagyň aýratynlyklary we ony netijeli hödürlemegiň usullary” atly temadan täsirli çykyş etdi.
Dil sapaklarynda görkezme esbaplaryň we tehniki serişdeleriň ulanylyşy barada mugallymlar özara tejribe alyşdylar. Maslahata gatnaşyjylar daşary ýurt dillerini okatmagyň döwrebap usullary barada giňişleýin pikir alyşdylar.
Aýna SÄTGELDIÝEWA,
Türkmenistanyň Daşary işler ministrliginiň
Halkara gatnaşyklary institutynyň
Dünýä dilleri kafedrasynyň mugallymy.