Daşary ykdysady iş bankyna talyplaryň tanyşlyk tejribeligi guraldy
2024-nji ýylyň 12-nji noýabrynda Türkmenistanyň Daşary işler ministrliginiň Halkara gatnaşyklary institutynyň Halkara ykdysady gatnaşyklary fakultetiniň talyplarynyň önümçilik tejribeligini geçýän döwürlerinde nazaryýetde alan bilimlerini tejribelikde berkitmek maksady bilen, Türkmenistanyň Döwlet daşary ykdysady iş bankyna tanyşlyk tejribeligi guraldy.
Häzirki döwürde Türkmenistanyň Döwlet daşary ykdysady iş banky ýurduň halkara maýa bazaryndaky bank bolup, Yslam Ösüş Bankynyň dolandyryjysynyň edarasy hökmünde strategiki maýa goýum taslamalaryny maliýeleşdirmekde möhüm orny eýeleýär. Bu bank, 2023-nji ýylyň 1-nji dekabrynda Beýik Britaniýanyň «Financial Times» abraýly neşiri, we «The Banker» žurnaly tarapyndan 15-nji gezek Türkmenistanyň Döwlet daşary ykdysady iş banky “Türkmenistanyň iň gowy banky” diýip atlandyryldy.
Şeýle hem, 2024-nji ýylyň 25-nji oktýabrynda Halkara Walýuta Gaznasynyň we Bütindünýä Bankynyň ABŞ-nyň Waşington şäherinde 2024-nji ýyldaky ýyllyk ýygnaklarynyň çäginde Türkmenistanyň Döwlet daşary ykdysady iş banky bilen Yslam Ösüş banky, bilelikde onkologiýa kesellerini bejermekde ýöriteleşen üç sany häzirki zaman lukmançylyk merkeziniň gurluşygy üçin 156,3 million dollarlyk ylalaşyk baglaşandygy hem bellärliklidir. Bu ýokary hilli hassahanalar Balkanabat, Türkmenabat we Mary şäherlerinde guruljak bu hassahanalar geljekde 11750-den gowrak näsaga ýokary hilli bejeriş hyzmatlaryny üpjün edip, ilat saglygy goraýyş ulgamynyň hilini ýokarlandyrmaga uly goşant goşar.
Bu tanyşlyk tejribeligi, talyplaryň nazaryýetde alan bilimlerini geljekde iş ýüzünde kämilleşdirmekde şeýle hem bank ulgamynda işlemek üçin gerekli bolan tejribeleri toplamakda uly mümkinçilikleri döreder.
Begendik DÖWLETÝAROW,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary
fakultetiniň IV ýyl talyby.