ÇEPER OKAÝYŞ BÄSLEŞIGI GEÇIRILDI
2026-njy ýylyň 27-nji aprelinde Türkmenistanyň Daşary işler ministrliginiň
Halkara gatnaşyklary institutynda Dünýä dilleri kafedrasynyň “Lingvo World” ylmy gurnagynyň çäginde ýokary okuw mekdebiň hyzmatdaş mekdepleriniň ýokary synp okuwçylarynyň arasynda “Languages — Key to Open the World” ady bilen daşary ýurt dillerinde çeper okaýyş bäsleşigi geçirildi.
Çeper okaýyş bäsleşigi hormatly Prezidentimiziň hem-de Gahryman Arkadagymyzyň döreden eserleri esasynda geçirildi. Türkmen halkynyň şöhratly taryhyny we dilini özara baglanyşyklaryny öwretmekde täzeçe çemeleşmeleriň netijeliligini tassyklaýan häzirki zaman okuw usuly bolan çeper okaýyş bäsleşigi iňlis we türkmen dillerinde alnyp baryldy. Bu bolsa okuwçylaryň we talyplaryň maglumatlary we sözlük gorlaryny has çuňňur we dowamly özleşdirmegine getirer. Çeper okaýyş bäsleşiginde aýdylyp geçilen taryhy maglumatlar, rowaýatlar we halk döredijiliginiň görnüşleri, dil öwretmekde diňe bir söz baýlygyny artdyrman, eýsem olaryň milli aň-düşünjesini hem ösdürmekde möhüm binýat bolup hyzmat edýär.
Bäsleşikde okuwçylar iki topara bölündi we bäsleşik deň netije bilen jemlendi. Okuwçylar özlerinde täsir galdyran rowaýatlary, pähimli sözleri we öwüt-nesihatlary beýan etmek bilen, çäräniň mazmunyny has-da baýlaşdyrdylar.
Nurgeldi ATAÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň 2-nji ýyl talyby.