Çempionatda ýaş tennisçiler
2023-nji ýylyň 2-nji maýynda paýtagtymyzdaky Olimpiýa şäherçesinde 12 ýaşly we ondan kiçi ýetginjek oglan-gyzlaryň arasynda tennis boýunça Aşgabat şäheriniň açyk çempionatyny başlandy. Türkmenistanyň Medeniýet ministrligi tarapyndan taýýarlanylan, sungat ussatlarynyň ýerine ýetiren dabaraly çykyşlary bilen başlan çempionat has hem tolgundyryjy boldy. Çempionatyň açylyş dabarasyna tennis muşdaklary, ýurdumyzyň ýokary okuw mekdepleriniň talyplary bilen bir hatarda Türkmenistanyň Daşary işler ministrliginiň Halkara gatnaşyklary institutynyň mugallymlarydyr talyp ýaşlary hem gatnaşdylar.
5-nji maýa çenli dowam etjek ýaryşda paýtagtymyzdan we ýurdumyzyň welaýatlaryndan ýetginjek türgenleriň 100-e golaýy jübütleýin we ýekeleýin görnüşlerde güýç synanyşarlar.Ýaryş şu ýylyň iýun aýynyň birinji on günlüginde Aşgabadyň Olimpiýa şäherçesinde geçiriljek Ýetginjekleriň arasynda tennis boýunça Merkezi Aziýanyň çempionatyna taýýarlygyň möhüm tapgyry bolar.
Kyýat ILAMANOW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň III ýyl talyby.