ÇAGALARY GORAMAGYŇ HALKARA GÜNI MYNASYBETLI OKUW MASLAHATY GEÇIRILDI
Mälim bolşy ýaly, her ýylyň 1-nji iýunynda dünýäniň ähli döwletlerinde, şeýle hem Türkmenistan Watanymyzda Çagalary goramagyň halkara güni giňden bellenilýär. Bu şanly sene mynasybetli şu günler ýurdumyzyň ähli künjeklerinde körpe nesillerimiz üçin baýramçylyk dabaralary, medeni köpçülikleýin çäreleri giň gerime eýe bolýar.
2024-nji ýylyň 31-nji maýynda Türkmenistanyň Daşary işler ministrliginiň Halkara gatnaşyklary institutynda Halkara hukugy we deňeşdirme hukuk öwreniş kafedrasynyň “Ýaş hukukçylar” ylmy gurnagynyň geçirmeginde Çagalary goramagyň halkara gününi wagyz-nesihat etmek maksady bilen Türkmenistanyň Mejlisiniň Deputaty Enejan Ataýewanyň gatnaşmagynda okuw sapagy geçirildi. Oňa institutymyzyň talyp ýaşlary gatnaşdylar.
Çykyş edenler çagalaryň hukuklaryny goramak babatynda Türkmenistanyň goşulan köp sanly halkara resminamalarynyň, şol sanda Çaganyň hukuklary hakynda Konwensiýanyň hökmany şerti bolup durýandygyny bellediler. Esasy Kanunymyz bolan Konstitusiýamyza laýyklykda, hakyky demokratik jemgyýete mahsus bolan çagalaryň hukuklarynyň goraglylygy barada Türkmenistanyň Mejlisi tarapyndan kabul edilen “Bilim hakynda”, “Türkmenistanda ýaşlar baradaky döwlet syýasaty hakynda”, “Çaganyň hukuklarynyň döwlet kepillikleri hakynda”, “Ýaşlary zähmet çekmäge bolan hukugynyň kepillendirmesi hakynda” we beýleki kanunlarynda öz beýanyny tapýandygyny mälim etdi.
Çagalaryň durmuşa bolan hukugy, doly ösmäge bolan hukugy, zyýanly täsirlerden goranmaga bolan hukugy, özlerine geleňsizlik bilen garalmagyndan hem-de özleriniň zähmetini peýdalanmakdan goranmak hukugy we maşgala, medeni hem-de ýaşaýyş-durmuş işlerine hemmetaraplaýyn gatnaşmak hukugy ýaly çagalaryň esasy hukuklarynyň göz öňünde tutulýandygy dogrusynda aýdyldy.
Ýatlap geçsek, Türkmenistan 1994-nji ýylda Çaganyň hukuklary hakynda Konwensiýany tassyklady. Şol günden bäri hem ýurdumyz ÝUNISEF-iň saglygy goraýyş, bilim, durmuş goraglylygy we çagalary goramak hem-de howanyň üýtgemegi bilen baglanyşykly ulgamda çagalaryň durmuşynda oňyn özgertmelere ýetmek ugrunda ýakyndan hyzmatdaşlyk saklaýar.
Okuw sapagynyň ahyrynda Garaşsyz, Baky Bitarap Watanymyzyň mundan beýläk-de gülläp ösmegi, halkymyzyň, aýratyn hem, ýaş nesilleriň bagtyýar geljegi üçin gije-gündiz aladalanýan Gahryman Arkadagymyzyň, Arkadagly Gahryman Serdarymyzyň janlarynyň sag, ömürleriniň uzak bolmagy, il-ýurt bähbitli tutumly işleriniň rowaçlyklara beslenmegi arzuw edildi.
Muhammet GYLYJOW,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň IV ýyl talyby.