Bütindünýä şygryýet güni
Şygryýet ynsan kalbynyň iň tämiz duýgularynyň, pähim-paýhasynyň we gözelliginiň sözdäki beýanydyr. Dünýä medeniýetiniň genji-hazynasyna öçmejek yz goşan söz ussatlaryny sarpalamak, poeziýanyň adamzat durmuşyndaky ornuny bellemek maksady bilen her ýylyň 21-nji martynda Bütindünýä şygryýet güni bellenilip geçilýär.
Bu halkara gününi bellemek baradaky karar ÝUNESKO-nyň 1999-njy ýylda Parižde geçirilen 30-njy Baş konferensiýasynda kabul edildi. Bu başlangyç dünýäniň dürli künjeklerinde ýaşaýan halklaryň dil dürlüligini gorap saklamaga, şygryýet arkaly medeni gatnaşyklary berkitmäge gönükdirilendir. ÝUNESKO-nyň resminamalaryna görä, bu baýramyň döredilmeginiň esasy sebäpleriniň biri dilden-dile geçip gelýän edebi mirasy durnukly etmek we poeziýanyň nusgawy keşbini dikeltmekdir. Şeýle hem bu sene arkaly ýaş zehinleri ýüze çykarmak, neşirýatlaryň şygryýet bölümlerine bolan gyzyklanmasyny artdyrmak we poeziýany teatr, saz ýaly beýleki sungat görnüşleri bilen sazlaşykda ösdürmek göz öňünde tutulýar. Ilkinji gezek bu sene 2000-nji ýylyň 21-nji martynda dabaraly ýagdaýda bellenildi.
Häzirki wagtda dünýäniň onlarça döwletinde bu gün mynasybetli dürli edebi agşamlar, çeper okaýyş bäsleşikleri we ylmy maslahatlar guralýar. Pariždäki ÝUNESKO-nyň ştab-kwartirasyndan başlap, dünýäniň iri kitaphanalaryna çenli bu gün “Söz sungatynyň baýramy” hökmünde giňden bellenilýär. Köpçülikleýin habar beriş serişdeleri meşhur şahyrlaryň ömri we döredijiligi barada ýörite gepleşikleri taýýarlaýarlar.
Biziň ýurdumyzda poeziýa milli gymmatlygyň we ruhy bitewiligiň sütünidir. Türkmenistanda Bütindünýä şygryýet gününiň bahar paslynyň hem-de Halkara Nowruz gününiň bellenilýän günlerine gabat gelmegi aýratyn simwoliki ähmiýete eýedir. Sebäbi bahar pasly ylhamyň, täze durmuşyň we döredijiligiň paslydyr.
Aýsona AMANJAÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň 3-nji ýyl talyby.