BÜTINDÜNÝÄ SAGLYK GÜNI
2026-njy ýylyň 1 — 7-nji apreli aralygynda Türkmenistanyň Daşary işler ministrliginiň Halkara gatnaşyklary institutynda Bütindünýä saglyk güni mynasybetli birnäçe sport ýaryşlary guraldy. 7-nji aprelde bolsa paýtagtymyzda hormatly Prezidentimiziň gatnaşmagynda köpçülikleýin welosipedli ýöriş geçirildi. Oňa Türkmenistanyň Daşary işler ministrliginiň Halkara gatnaşyklary institutynyň talyplary hem işjeň gatnaşdylar. Arkadagly Gahryman Serdarymyzyň gatnaşmagynda köpçülikleýin welosipedli ýörişiň guralmagy, dürli sport çäreleriniň giň gerime eýe bolmagy ýurdumyzda sagdyn durmuş ýörelgeleriniň barha dabaralanýandygynyň subutnamasydyr. Welosiped aglaba wagtyny okuw bilen geçirýän ýaş nesil üçin sagdyn we işjeň durmuş ýörelgelerine eýermegiň netijeli usulydyr.
Diňe bular bilen çäklenmän, Bütindünýä saglyk güni mynasybetli institutyň Kärdeşler arkalaşygynyň ilkinji guramasy bilen bilelikde «Gajetlerden pauza» atly sport ýaryşy hem geçirildi. Dürli gurluşly elektron enjamlarynyň özleriniň saglygyna we bilimine zyýansyz ulanylmagyny gazanmak, ýaşlaryň bu meseleler barada düşünjesini ýokarlandyrmak, aýratyn-da olaryň saglygyny berkitmek maksady bilen geçirilen bu sport çäresine institutyň fakultetleriniň talyplary uly höwes bilen gatnaşdylar.
Şeýlelikde, şu gün paýtagtymyzda geçirilen köpçülikleýin welosipedli ýöriş halkymyzyň agzybirliginiň we jebisliginiň, Garaşsyz, baky Bitarap Watanymyzyň hiç wagt könelmejek umumadamzat gymmatlyklaryna, durmuşa geçirýän parahatçylyksöýüjilik syýasatyna hem-de saýlap alan döredijilik ýoluna ygrarlydygynyň nobatdaky güwäsi boldy.
Mirapguly ATANYÝAZOW,
Türkmenistanyň Daşary işler ministrliginiň
Halkara gatnaşyklary institutynyň
Jemgyýeti öwreniş ylymlary
kafedrasynyň mugallym-öwrenijisi.