BÜTINDÜNÝÄ SAGLYK GÜNI MYNASYBETLI GEÇIRILEN BRIFING
2022-nji ýylyň aprel aýynyň 6-syna Türkmenistanyň Saglygy goraýyş we derman senagaty ministrliginde 7-nji aprel – Bütindünýä saglyk güni mynasybetli «Saglyk» Döwlet maksatnamasyny üstünlikli durmuşa geçirmekde ýetilen sepgitler bilen bagly brifing geçirildi. Oňa BMG-niň Türkmenistandaky wekilleri, Türkmenistanyň Daşary işler ministrliginiň, Türkmenistanyň Saglygy goraýyş we derman senagaty ministrliginiň, Gyzyl Ýarymaý Milli jemgyýetiniň, Türkmenistanyň Daşary işler ministrliginiň Halkara gatnaşyklary institutynyň, M.Garryýew adyndaky Türkmenistanyň Döwlet lukmançylyk uniwersitetiniň we köpçülikleýin habar beriş serişdeleriniň wekilleri gatnaşdylar.
Maslahatda Bütindünýä saglygy goraýyş guramasynyň Türkmenistandaky ýurt boýunça edarasynyň ýolbaşçysy Ýegor Zaýsew, ÝUNFPA-nyň Türkmenistandaky Ýerine ýetiriji wekili Aýna Seýitliýewa, ÝUNISEF-iň Türkmenistandaky wekiliniň wezipesini ýerine ýetiriji Aleksandru Nartea, Türkmenistanyň Saglygy goraýyş we derman senagaty ministrliginiň wekilleri Maral Güjikowa, Ogulmähri Geldiýewa hem-de Myrat Garryýew adyndaky Türkmenistanyň Döwlet lukmançylyk uniwersitetiniň mugallymy Leýli Öwezberdiýewa çykyş etdi. Agzalan guramalar bilen Türkmenistanyň hyzmatdaşlygy, ýurtda saglygy goraýyş ulgamynda ýetilen sepgitler, öňde duran wezipeler, ekologik abadançylygyň saglyga täsiri, «Bitewi saglyk» düşünjesi, Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň serişdeleriniň hasabyna alnyp barylýan işler çykyşlaryň özenini düzdi.
Soňra maslahat öz işini Türkmenistanyň Saglygy goraýyş we derman senagaty ministrliginiň Halkara okuw-ylmy merkezinde, Enäniň we çaganyň saglygyny goraýyş ylmy-kliniki merkezinde, Jemgyýetçilik saglygy we iýmit merkezinde dowam etdi.
Bölümçeler arkaly dowam eden brifingde Saglyk konsepsiýasynyň çäginde tebigaty gorap saklamagyň adamlaryň hereketine baglydygy, onuň hem öz gezeginde adamyň saglygyna gönüden-göni täsir edýändigi barada aýdylanlar has-da täsirliligi bilen tapawutlandy.
Aýgözel ÖWEZOWA,
Türkmenistanyň Daşary işler ministrliginiň
Halkara gatnaşyklary institutynyň aspiranty.