“BREÝN – RING” BÄSLEŞIGI GEÇIRILDI
2026-njy ýylyň 16-njy fewralynda Türkmenistanyň Daşary işler ministrliginiň Halkara gatnaşyklary institutynda Magtymguly adyndaky Türkmen döwlet uniwersitetiniň, Halkara ynsanperwer ylymlary we ösüş uniwersitetiniň, Döwletmämmet Azady adyndaky Türkmen milli dünýä dilleri institutynyň, şeýle hem Türkmenistanyň Daşary işler ministrliginiň Halkara gatnaşyklary institutynyň talyplarynyň gatnaşmagynda «Breýn-ring» bäsleşigi geçirildi. Bäsleşik Türkmenistanyň Daşary işler ministrliginiň, Türkmenistanyň Magtymguly adyndaky Ýaşlar guramasynyň Aşgabat şäheriniň Berkararlyk etrap Geňeşiniň, Türkmenistanyň Daşary işler ministrliginiň Halkara gatnaşyklary institutynyň guramagynda 2026-njy “Garaşsyz baky Bitarap Türkmenistan - bedew batly at-myradyň mekany” ýylynda bellenilýän Türkmenistanyň diplomatik işgärleriniň güni mynasybetli geçirildi.
Bäsleşigiň maksady Berkarar döwletiň täze eýýamynyň Galkynyşy döwründe “Garaşsyz, baky Bitarap Türkmenistan – bedew batly at-myradyň mekany” ýylynda Türkmenistan döwletimiziň baky Bitaraplygynyň ähmiýetini hem-de döwletimiziň parahatçylyk söýüji başlangyçlarynyň many-mazmunyny talyp ýaşlaryň arasynda düşündirmekden, ýurdumyzyň daşary syýasatyny we halkara ykdysady ýagdaýlaryny ýokary okuw mekdepleriniň talyp ýaşlarynyň arasynda ýaýbaňlandyrmakdan, şeýle hem zehinli ýaşlary ýüze çykarmakdan ybaratdyr.
Gyzykly geçen «Breýn-ring» bäsleşiginiň jemleri boýunça Türkmenistanyň Daşary işler ministrliginiň Halkara gatnaşyklary institutynyň talyplar topary Baş baýraga, Halkara ynsanperwer ylymlary we ösüş uniwersitetiniň talyplar topary I orna, Magtymguly adyndaky Türkmen döwlet uniwersitetiniň talyplar topary II orna, Döwletmämmet Azady adyndaky Türkmen milli dünýä dilleri institutynyň talyplar topary bolsa III orna mynasyp bolmagy başardylar. Ýeňiji bolan toparlara Türkmenistanyň Magtymguly adyndaky Ýaşlar guramasynyň Aşgabat şäheriniň Berkararlyk etrap Geňeşiniň sowgatlary gowşuryldy.
Şyhdurdy ŞYHYÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň 3-nji ýyl talyby.