BMG-niň wodorod energetikasy boýunça birinji dialogy
2022-nji ýylyň 1-nji aprelinde Birleşen Milletler Guramasynyň Senagat ösüşi boýunça guramasynyň (UNIDO) guramagynda “Wodorod energiýasyny senagatda ulanmak boýunça UNIDO-nyň global hyzmatdaşlygy” meselelerine bagyşlanan birinji dialog geçirildi. Bu ylmy çärä ýurdumyzyň degişli ugurly ministrlikleriniň we ýokary okuw mekdepleriniň wekilleri, hünärmenleri we bilermenleri gatnaşdylar.
Maslahatyň barşynda halkara bilermenleri wodorod energetikasyny senagatda ulanmagyň aýratynlyklary, global wodorod energetikasynyň merkezleriniň emele gelmegi, UNIDO-nyň wodorod energetikasy boýunça dünýäniň döwletleriniň ylmy merkezleri bilen netijeli işleriniň aýratynlyklary barada giňişleýin gürrüňleri berdiler. Dialogyň gün tertibine Merkezi Aziýada hususan-da, Türkmenistanda wodorod energetikasyny ösdürmegiň möhüm meseleleri girizildi we bu boýunça hünärmenleriň arasynda pikir alyşmalar gurnaldy.
Maslahatyň ahyrynda oňa gatnaşyjylar şular ýaly işleri amala aşyrmaga giň ýol açan we yzygiderli mümkinçilikleri döredýän Türkmenistanyň Prezidenti Serdar Berdimuhamedowa uly minnetdarlyk bildirdiler.
Arslan Syýahatow,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň
I ýyl talyby.