BMG-niň Merkezi Aziýa üçin Öňüni alyş diplomatiýasy boýunça sebitleýin merkezinde gender deňligi boýunça okuw sapagy geçirildi
2022-nji ýylyň 18-nji oktýabrynda Birleşen Milletler Guramasynyň Merkezi Aziýa üçin Öňüni alyş diplomatiýasy boýunça sebitleýin merkezinde Beýik Britaniýanyň Türkmenistandaky ilçihanasy we BMG-niň Merkezi Aziýa üçin Öňüni alyş diplomatiýasy boýunça sebitleýin merkezi tarapyndan gender deňligi meseleleri boýunça okuw sapagy gurnaldy. Gibrid görnüşinde geçirilen okuw sapagyna onuň Alyhezreti Beýik Britaniýanyň we Demirgazyk Irlandiýanyň Birleşen Patyşalygynyň Türkmenistandaky Adatdan daşary we Doly ygtyýarly ilçisi Lýusiýa Uaýld, Beýik Britaniýanyň Türkmenistandaky ilçihanasynyň wekilleri, BMG-niň Merkezi Aziýa üçin Öňüni alyş diplomatiýasy boýunça sebitleýin merkeziniň wekilleri, DÖM-iň ýaş ilçileri we Öňüni alyş diplomatiýasy akademiýasynyň okuwçylary gatnaşdylar.
Beýik Britaniýanyň we Demirgazyk Irlandiýanyň Birleşen Patyşalygynyň Türkmenistandaky Adatdan daşary we Doly ygtyýarly ilçisi Lýusiýa Uaýld tarapyndan alnyp barylan okuw sapagynyň dowamynda sebitdäki gender deňligi baradaky meseleler ara alnyp maslahatlaşyldy, sebitiň ýurtlarynyň Öňüni alyş diplomatiýasy akademiýasynyň okuwçylarynyň ady agzalan mesele boýunça çykyşlary diňlenildi. Okuw sapagynyň ahyrynda hormatly ilçi bilen ýadygärlik surata düşmek dabarasy geçirildi.
Arslankerim KERIMOW,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň
4-nji ýyl talyby.