BMG-NIŇ MERKEZI AZIÝA ÜÇIN ÖŇÜNI ALYŞ DIPLOMATIÝASY BOÝUNÇA SEBIT MERKEZINE GYZYKLY GEZELENÇ
2022-nji ýylyň 16-njy maýynda Türkmenistanyň Daşary işler ministrliginiň Halkara gatnaşyklary institutynyň Ýaş diplomatlaryň mekdebiniň agzalarynyň gatnaşmagynda 2007-nji ýylyň 10-njy dekabrynda ştab-kwartirasy Aşgabatda açylan BMG-niň Merkezi Aziýa üçin Öňüni alyş diplomatiýasy boýunça Sebit merkezine gezelenç gurnaldy.
Mekdep okuwçylary bu ýerde Türkmenistanyň BMG-niň Merkezi Aziýa üçin Öňüni alyş diplomatiýasy boýunça Sebit merkezi bilen tejribe alyp baryşlaryny, Öňüni alyş diplomatiýasynyň serişdelerini täsirli işläp we ony durmuşa geçirmek babatda alyp barýan işlerini, sebitde parahatçylygy we howpsuzlygy üpjün etmeklige gönükdirilen hyzmatdaşlygy hakynda maglumatlar bilen tanyşdylar.
BMG-niň Merkezi Aziýa üçin Öňüni alyş diplomatiýasy boýunça Sebit merkeziniň hereket etmegi Türkmenistana özüniň daşary syýasatynyň we diplomatiýasynyň öňüni alyş ugruny esli güýçlendirmäge mümkinçilik berýär.
Gezelenjiň ahyrynda oňa gatnaşyjylar ýurdumyzda ýaş nesilleriň her biriniň ukyp-başarnyklaryny, zehin aýratynlyklaryny açyp görkezmäge, watançy ýaşlar bolup ýetişmäge döredilýän giň mümkinçilikler üçin Arkadagly Serdarymyza alkyş sözlerini aýtdylar.
Arslan SYÝAHATOW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň I ýyl talyby.