"Bitaraplyk derejesi – döwletleriň taryhynda” atly bäsleşik
2022-nji ýylyň 7-nji dekabrynda Türkmenistanyň Daşary işler ministrliginiň Halkara gatnaşyklary institutynyň Jemgyýeti öwreniş ylymlary kafedrasynyň “Paýhas we parasat” ylmy gurnagy we “Parahatçylyk medeniýeti” atly ÝUNESKO klubynyň gurnamagynda “Bitaraplyk derejesi – döwletleriň taryhynda” atly tema boýunça akyl-paýhas bäsleşigi geçirildi. Bäsleşik institutymyzyň II ýyl talyplarynyň arasynda gurnaldy. Talyplar bu bäsleşige işjeň gatnaşyp, dünýä döwletleriniň bitaraplyk derejeleriniň taryhy we tejribesi barada özleriniň bilim derejelerini görkezdiler.
Bäsleşik bäş tapgyrda geçirildi. Olaryň dowamynda toparlar taýýarlanylan soraglara jogap berdiler, prezentasiýa bilen çykyş etdiler we karta bilen baglanyşykly sowallary çözmeli boldular. Bäsleşik özüniň gyzgalaňlylygy bilen tapawutlandy. Emin agzalaryň bahalandyrmagy netijesinde, I orna Halkara gatnaşyklary fakultetiniň talyplary, II orna Halkara ykdysady gatnaşyklary fakultetiniň talyplary, III orna Halkara žurnalistikasy fakultetiniň talyplary mynasyp boldular.
“Bitaraplyk derejesi – döwletleriň taryhynda” atly bäsleşigiň ýeňijilerine “Paýhas we parasat” gurnagy tarapyndan taýýarlanylan ýadygärlik sowgatlar dabaraly ýagdaýda gowşuryldy.
Batyr ESENOW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň II ýyl talyby.