«Birleşen Milletler Guramasynyň nusgasy» atly akyl-paýhas bäsleşigi
2022-nji ýylyň 3-nji martynda Halkara ynsanperwer ylymlary we ösüş uniwersitetinde Türkmenistanyň Birleşen Milletler Guramasyna agza bolmagynyň 30 ýyllygy mynasybetli «Birleşen Milletler Guramasynyň nusgasy» atly akyl-paýhas bäsleşigi geçirildi. Türkmenistanyň Daşary işler ministrligi bilen Birleşen Milletler Guramasynyň bilelikde geçiren bu bäsleşigine Türkmenistanyň Daşary işler ministrliginiň Halkara gatnaşyklary institutynyň, Halkara ynsanperwer ylymlary we ösüş uniwersitetiniň, Magtymguly adyndaky Türkmen döwlet uniwersitetiniň, Döwletmämmet Azady adyndaky Türkmen milli dünýä dilleri institutynyň, Ýagşygeldi Kakaýew adyndaky Halkara nebit we gaz uniwersitetiniň talyplary gatnaşdylar.
Bäsleşigiň esasy maksady Türkmenistanyň Birleşen Milletler Guramasyna agza bolmagynyň 30 ýyllygyny dabaralandyrmak, talyp ýaşlara Birleşen Milletler Guramasynyň Baş Assambleýasynyň işiniň gidişi, onda kabul edilýän maksatnamalar, BMG-niň düzümindäki ýolbaşçylaryň hem-de işgärleriniň wezipeleri we jogapkärçiligi, ylalaşyklaryň gazanylyşy baradaky düşünjeleri giňişleýin bermek, şeýle-de ýaşlaryň dil bilimini hem-de dilewarlygyny ösdürmekden ybarat bolup durýar.
«Birleşen Milletler Guramasynyň nusgasy» atly akyl-paýhas bäsleşiginiň açylyş dabarasyna ÝUNISEF-iň Türkmenistandaky wekili A.Nartea gatnaşyp, Türkmenistan bilen Birleşen Milletler Guramasynyň arasyndaky hyzmatdaşlyk barada çykyş etdi. Bu akyl-paýhas bäsleşigine gatnaşan talyplaryň hersi Birleşen Milletler Guramasyna agza döwletleriň Doly ygtyýarly wekili hökmünde şol döwletleriň milli bähbitlerini gorap çykyş etdiler. Bäsleşigiň dowamynda halkara gatnaşyklaryndaky meseleler barada pikir alşylyp, teklipler ara alnyp maslahatlaşyldy. Çykyşlar esasynda ýörite Kararnama kabul edilip, akyl-paýhas bäsleşigine gatnaşan ähli talyplara ýadygärlik sowgatlary gowşuryldy.
Arslan SYÝAHATOW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň I talyby.