Birleşen Milletler Guramasynyň güni mynasybetli bäsleşik
2021-nji ýylyň 22-nji oktýabrynda Türkmenistanyň Daşary işler ministrliginiň Halkara gatnaşyklary institutynda Birleşen Milletler Guramasynyň güni mynasybetli Dünýä dilleri kafedrasynyň “Lingvo World” gurnagynyň guramagynda institutyň ähli fakultetleriniň birinji ýyl talyplarynyň arasynda “BMG - Türkmenistanyň esasy strategik hyzmatdaşy hökmünde” atly zehin bäsleşigi geçirildi. 1945-nji ýylyň 24-nji oktýabrynda BMG-niň Tertipnamasy güýje girdi we şondan bäri 24 oktýabr Birleşen Milletler Guramasynyň güni hökmünde bellenilýär.
Bäsleşik iňlis dilinde geçirildi. Bäsleşikde dört topar, her fakultetden bir topar aşakdaky görkezilen şertler boýunça bäsleşdiler:
1) BMG-niň esasy guramalary barada çykyş etmek;
2) BMG-niň taryhy, gurluşy, alyp barýan işleri barada soraglara jogap bermek;
3) Türkmenistan bilen BMG-niň arasyndaky hyzmatdaşlyk, şeýle hem Türkmenistanyň hormatly Prezidentiniň BMG-niň Baş Assambleýasynyň 76-njy mejlisinde öňe süren halkara başlangyçlary we teklipleri barada iňlis dilinde gürrüň bermek.
Bäsleşigiň esasy maksady talyplaryň daşary ýurt dillerini kämilleşdirmek we sözleýiş endiklerini ösdürmek, şeýle hem BMG esasy we ýöriteleşdirilen edaralart baradaky bilimlerini giňeltmekden ybaratdyr.
Şu nukdaýnazardan, Dünýä dilleri kafedrasynyň mugallymlaryndan düzülen emin agzalary ýeňijileri yglan etmekde öran adalatly çemeleşdiler. Netijede, 1-nji orna Halkara žurnalistikasy fakultetiniň topary, 2-nji orna Halkara ykdysady gatnaşyklary fakultetiniň topary, 3-nji orna Halkara gatnaşyklary fakultetiniň topary mynasyp boldy.
Amanbagt USSAÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň talyby.