BILERMENLERIŇ GATNAŞMAGYNDA OKUW MASLAHATY GEÇIRILDI
2023-nji ýylyň 11-nji oktýabrynda Türkmenistanyň Daşary işler ministrliginiň Halkara gatnaşyklary institutynda Adwakatura edaralarynyň hereket etmegi barada halkara maslahata gatnaşýan Ýewropa Geňeşiniň bilermenleri tarapyndan hukuk hünäri boýunça okaýan talyplar üçin okuw maslahaty geçirildi. Bu maslahata Türkmenistanyň Daşary işler ministrliginiň Halkara gatnaşyklary institutynyň, Halkara ynsanperwer ylymlary we ösüş uniwersitetiniň, Magtymguly adyndaky Türkmen döwlet uniwersitetiniň talyplary gatnaşdylar. Maslahatda Ýewropa Geňeşiniň Adam hukuklary boýunça bölüm müdiri Sergeý Dikman, Ýewropa Geňeşiniň hukukçy geňeşçisi Ewa Massa, Ýewropa Geňeşiniň Adam hukuklary boýunça utgaşdyryjy müdiri Kristina Hahlowa çykyş etdiler. Onda Ýewropa Geňeşi we onuň hukuk düzgünleriniň kämilleşişi barada talyp ýaşlara giňişleýin gürrüň berildi.
Maslahatda bellenilişi ýaly, Ýewropa Geňeşi bilen hyzmatdaşlygyň giňeldilmegi hormatly Prezidentimiziň ýolbaşçylygynda üstünlikli durmuşa geçirilýän daşary syýasy strategiýanyň ileri tutulýan ugurlarynyň biridir. Köp ýyllaryň dowamynda Ýewropa Geňeşi bilen hyzmatdaşlygyň Türkmenistany mundan beýläk-de ykdysady we durmuş taýdan ösdürmegiň ileri tutulýan wezipelerini çözmäge gönükdirilen ýörite taslamalaryň we maksatnamalaryň çäklerinde netijeli ösdürilýändigi nygtaldy. Türkmenistanyň demokratik, hukuk we dünýewi döwlet hökmünde ählumumy gün tertibiniň, şol sanda belent ynsanperwerlik taglymatlaryny hem-de gymmatlyklaryny berkarar etmek meseleleriniň çözülmegine gönükdirilen başlangyçlar bilen çykyş edýändigine aýratyn üns çekildi.
Biziň Garaşsyz, Bitarap ýurdumyz adam hukuklaryny we bähbitlerini goramagy döwlet syýasatynyň ileri tutulýan ugry hökmünde yglan etmek bilen hem-de halkara hukugyň umumy ykrar edilen kadalaryna laýyklykda degişli resminamalary ýerine ýetirmek boýunça öz üstüne alan borçnamalaryna yzygiderli eýerýär.
Bibimerýem SÖÝÜNGULYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň I ýyl talyby.