“BERKARAR DÖWLETIŇ BAGTYÝAR GERÇEKLERI” ATLY DÖREDIJILIK BÄSLEŞIGI
2021-nji ýylyň 23-nji aprelinde Türkmenistanyň Daşary işler ministrliginiň Halkara gatnaşyklary institutynda Türkmenistanyň Magtymguly adyndaky Ýaşlar guramasynyň Merkezi Geňeşiniň hem-de Türkmenistanyň Bilim ministrliginiň bilelikde guramagynda “Berkarar döwletiň bagtyýar gerçekleri” atly döredijilik bäsleşiginiň institut tapgyry geçirildi. Oňa institutyň professor-mugallymlary we talyp ýaşlary gatnaşdylar.
Bu döredijilik bäsleşiginde Halkara gatnaşyklary fakultetinden Baýnazar Nepesow, Halkara hukugy fakultetinden Beggeldi Gutlyýew, Halkara ykdysady gatnaşyklary fakultetinden Berdinyýaz Goňurow, Halkara žurnalistikasy fakultetinden Rahym Şameýew dagylar bäsleşdiler.
Bäsleşigiň birinji şerti boýunça talyp ýigitler özleriniň saýlap alan hünäriniň jemgyýetdäki ornuny çeper okaýyş bilen wasp etdiler.
Ikinji şert boýunça ýigitler öz başarnygyna görä “Türkmenistan – parahatçylygyň we ynanyşmagyň Watany” ýyly bilen baglanyşykly goşgulary hem-de sahna oýunlaryny ýerine ýetirdiler.
Bäsleşigiň soňky şerti boýunça talyp ýigitler ýekelikde şorta sözleri ýerine ýetirmek boýunça bäsleşdiler.
Emin agzalaryň gelen netijesine görä Halkara gatnaşyklary fakultetiniň 1-nji ýyl talyby Baýnazar Nepesow “Berkarar döwletiň bagtyýar gerçekleri” atly döredijilik bäsleşiginiň ýeňijisi diýip yglan edildi. Bäsleşigiň ahyrynda aýratyn tapawutlananlara hem-de ýeňijilere Türkmenistanyň Magtymguly adyndaky Ýaşlar guramasynyň Merkezi Geňeşiniň we Türkmenistanyň Bilim ministrliginiň Hormat hatlary, ýadygärlik sowgatlary dabaraly ýagdaýda gowşuryldy.
Jennet OMAROWA,
Türkmenistanyň daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň II ýyl talyby.