Berkarar döwletiň bagtyýar gerçegi
2022-nji ýylyň 29-njy aprelinde Türkmenistanyň Daşary işler ministrliginiň Halkara gatnaşyklary institutynda Gahryman Arkadagymyzyň: «Ýaşlarymyzyň ýokary derejede bilim almagyna, saýlan hünäriniň eýesi bolmagyna ýardam bermek, olary ylyma-bilime höweslendirmek, halallyk, agzybirlik, ýokary watançylyk ruhunda terbiýelemek baradaky alada ýurdumyzda alnyp barylýan ähli özgertmeleriň özenidir» diýen parasatly sözlerinden, talyp ýaşlar barada edýän bimöçber aladalaryndan, gymmatly maslahatlaryndan ugur alyp, Türkmenistanyň Magtymguly adyndaky Ýaşlar guramasynyň Merkezi Geňeşi hem-de Türkmenistanyň Bilim ministrligi tarapyndan talyp ýaşlaryň zehin-başarnyklaryny ýüze çykarmak maksady bilen, Ýeňiş güni mynasybetli ýurdumyzyň ýokary okuw mekdepleriniň talyp ýigitleriniň arasynda yglan edilen «Berkarar döwletiň bagtyýar gerçekleri» atly döredijilik bäsleşiginiň deslapky tapgyry geçirildi. Bäsleşikde Halkara gatnaşyklary, Halkara hukugy, Halkara ykdysady gatnaşyklary, Halkara žurnalistikasy fakultetinden saýlanan talyp ýigitler özara bäsleşdiler. Institutyň talyp ýigitleri Türkmenistanyň Magtymguly adyndaky Ýaşlar guramasynyň Merkezi Geňeşiniň we Türkmenistanyň Bilim ministrliginiň ýurdumyzyň talyp ýigitleriniň arasynda guraýan bu döredijilik bäsleşiginiň ýörite taýýarlanan düzgünnamasy esasynda düzülen üç şert boýunça bäsleşdiler.
Bäsleşigiň birinji şertine laýyklykda, talyp ýigitler özüniň saýlap alan hünäriniň jemgyýetdäki ornuny çeper okaýyş arkaly wasp etdiler. Bäsleşigiň ikinji şertine görä, «Halkyň Arkadagly zamanasy» ýyly bilen baglanyşykly talyp ýigitler özleriniň döredijilige hem-de sungata bolan ukyby bilen türkmen ýigidine mahsus ajaýyp häsiýetleri açyp görkezdiler. Soňky şert boýunça talyp ýigitler ýekelikde şorta sözleri ýerine ýetirmek boýunça bäsleşdiler.
Emin agzalaryň gelen netijesine görä, Halkara hukugy fakultetiniň 1-nji ýyl talyby Muhammet Abdylweliýew «Berkarar döwletiň bagtyýar gerçekleri» atly döredijilik bäsleşiginde Baş baýraga mynasyp boldy. Halkara žurnalistikasy fakultetiniň talyby Batyrmuhammet Orazow birinji, Halkara ykdysady gatnaşyklary fakultetiniň talyby Orazberdi Oraztaganow ikinji, Halkara gatnaşyklary fakultetiniň talyby Arslan Syýahatow üçünji orna mynasyp boldy. Döredijilik bäsleşiginde Baş baýraga mynasyp bolan Halkara hukugy fakultetiniň 1-nji ýyl talyby Muhammet Abdylweliýew bäsleşigiň jemleýji tapgyryna gatnaşmaga hukuk gazandy. Ýeňiji bolan talyp ýaşlara bäsleşigi gurnaýjylar tarapyndan hormat hatlary we ýadygärlik sowgatlary dabaraly ýagdaýda gowşuryldy.
Hatyja GYLYJOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň I ýyl talyby.