Bag ekmek — ömre dowamat
Berkarar döwletiň täze eýýamynyň Galkynyşy döwründe ýurdumyzy bagy-bossanlyga öwürmek, tokaý zolaklaryny döretmek we ekilen bag nahallaryna talabalaýyk ideg etmek, şäheriň arassaçylygyny saklamak maksady bilen, 2022-nji ýylyň 5-nji noýabrynda ýurdumyzda ählihalk bag ekmek dabarasy geçirildi. Bu dabara mynasybetli döwletimiziň ähli künjeginde täze bag nahallary oturdyldy. Ählihalk bag ekmek dabarasy güni Türkmenistanyň Daşary işler ministrliginiň Halkara gatnaşyklary institutynyň talyplary hem ýokary okuw mekdebiniň çäginde, şeýle-de institutyň garamagyndaky bag meýdançalarda baglara ideg etmek babatda degişli işleri geçirdiler. Talyplar öz işleriniň dowamynda bag nahallaryna ideg edip, ýan-ýodalarda tämizlik işlerini ýerine ýetirdiler.
Häzirki wagtda ýurdumyzda oňyn ekologiýa şertleriniň döredilmegi, tokaýlaryň durnukly dolandyrylmagy hem-de olaryň bioköpdürliliginiň goralyp saklanylmagy boýunça toplumlaýyn maksatnama durmuşa geçirilýär. Bu ugurdaky milli kanunçylyk binýady has hem kämilleşdirilip, halkara hyzmatdaşlygy işjeňleşdirilýär. Ýurdumyzda yzygider geçirilýän ählihalk bag ekmek dabaralary Diýarymyzyň daşky gurşawyny goramakda wajyp ähmiýete eýe bolup durýandyr.
Eziz EMINOW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň
II ýyl talyby.