Aýdym-sazly baýramçylyk dabarasy geçirildi
2022-nji ýylyň noýabr aýynyň 9-na Türkmenistanyň Magtymguly adyndaky Ýaşlar guramasynyň Aşgabat şäheriniň Berkararlyk etrap Geňeşi hem-de Türkmenistanyň Daşary işler ministrliginiň Halkara gatnaşyklary institutynyň bilelikde guramagynda ýaşlarymyzyň gadymdan bäri nesilden-nesle geçip gelýän mirasymyza, milliligimize bolan söýgüsini has-da ýokarlandyrmak maksady bilen Türkmenistanyň Magtymguly adyndaky Ýaşlar guramasynyň döredilen güni mynasybetli “Kalby hyjuwly ýaşlaryň-söýgüsidir gül Watan ” şygary atly aýdym-sazly baýramçylyk dabarasy geçirildi. Baýramçylyk dabarasynda Türkmenistanyň Magtymguly adyndaky Ýaşlar guramasynyň Aşgabat şäheriniň Berkararlyk etrap Geňeşiniň sanly ulgam boýunça esasy hünärmeni O.Sapardurdyýewa, Aşgabat şäheriniň Tebigy ugurlary dersine ýöriteleşdirilen 44-nji orta mekdebiniň ýokary derejeli mugallymy Ş. Ýegelekowa hem-de institutymyzyň halypa mugallymlary we talyplary ýurdumyzda hormatly Prezidentimiz tarapyndan ýaşlar barada edilýän aladalar barada gürrüň berdiler. Şeýle-de institutymyzyň aýdym-saz toparynyň birnäçe çykyşlaryna hem tomaşa edildi. Maslahatyň dowamynda Türkmenistanyň Magtymguly adyndaky Ýaşlar guramasynyň Aşgabat şäher Geňeşiniň baýraklaryny gowşurmak dabarasy geçirildi. Onda institutyň işjeň mugallymlary we talyplary gymmat bahaly sowgatlar bilen sylaglandylar.
Maslahatyň ahyrynda oňa gatnaşyjylar Türkmenistanyň Magtymguly adyndaky Ýaşlar guramasynyň döredilen güni mynasybetli gutlag sözlerini beýan etdiler. Şeýle-de hormatly Prezidentimize alyp barýan işjeň syýasaty, amala aşyrýan özgertmeleri we Magtymguly adyndaky Ýaşlar guramasyna berýän yzygiderli goldawy üçin köp sagbolsun aýtdylar.
Beggeldi GUTLYÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň 3-nji ýyl talyby.